Home Hudicial Homber a presenta den Corte sospecha pa menaza di morto

Homber a presenta den Corte sospecha pa menaza di morto

166
0
SHARE
- Advertisement -

ORANJESTAD (AAN): E homber di inicial L.M. a para riba cu ningun momento el a menaza e homber O., kende e conoce hopi bon.

El a bisa Hues cu O. lo ta gaña. Fiscal a exigi castigo condicional y Hues teniendo cuenta cu L.M. su declaracion den Corte a haci e castigo condicional menos.

   MENAZA DI MORTO:

Fiscal a acusa L.M. cu dia 26 Mei 2019 el a menaza e homber O. cu morto dilanti un supermercado Chines. Fiscal a bisa cu L.M. a bisa:’ mi ta bay tira bo, awor si bo ta cuminsa soda, no”.

Hues a bisa cu e homber O. a bisa Polis cu L.M. a menace cu morto banda di un supermercado Chines na Dakota. O. a bisa Polis cu L.M. a pone man na heup di carson y purba saca algo. O. ta sospecha cu L.M. lo tin arma. El a bisa cu e conoce L.M. y sa cu L.M. ta bira violento. E tin miedo cu L.M. lo haci’e.

L.M. den Corte a bisa Hues cu e ta kere cu nan ta gaña riba dje. E kiermen aki O. y e amiga di O. cu tambe a declara contra L.M. Segun L.M., semper e ta bay e Chines y e ta respeta e Chines y O. El a bisa Hues cu e no ta durf di haci esaki. El a bisa cu e no sa si O. lo ta complice den e caso contra dje den pasado. E ta haya straño.

   A TIRA RIBA SOSPECHOSO:

Hues a bisa cu por ta algo a pasa den pasado. Por ta cu door cu nan a tira riba L.M. Segun L.M. na November 2018 nan a tira riba dje y herid’e. El a bisa cu O. ta testigo den e caso ey.

El a bisa cu e no sa mira O. mes. E tiramento aki ta relaciona cu e caso di asesina na 2006, caminda L.M. a los un tiro y bala a herida un dama inocente cu tabata para den vecindario.

Na November 2018, e ruman homber di e dama, a tira L.M.

    A CAMBIA BIDA:

Hues a mustra cu L.M. tin carchi di castigo. Na 2003 a condena L.M. pa menaza. Na 2006 a condena L.M. pa asesinato di un dama caminda el a haya 15 aña di prison. Tambe e tin un castigo pa un caso di maltrato na 2017.

L.M. a bisa Hues cu no ta pasobra el a cay sera den pasado el a keda mesun cos. El a bisa Hues cu el a cambia su bida. Segun L.M., e ta purba tur dia di haci bon. El a splica Hues cu awa na wowo cu door di e problema di tiramento e cu su partner a dicidi di separa pero e ta papia cu su yiu muher. El a bisa cu el a acerca FCCA pa e haya un cas pasobra su mama ta bibando spanta, despues di e tiramento na November 2018.

L.M. a sigui bisa cu door di e heridanan cu el a sufri di e tiramento, e no por traha. Otro aña e lo mester bay dokter pa haci evaluacion di su pulmonnan y su man.

   RECLAMA ACCION DI POLIS:

L.M. a cuestiona e forma con Polis a drenta su cas y deten’e siendo cu el a bisa nan cu el a caba di haci operacion. El a bisa Hues cu ora Polis a drenta su cas, el a bisa nan cu e a haci nada.

El a mustra con Polis a forze ariba vloer siendo cu el a bay drumi y a bisa nan cu el a haci operacion y no por move. El a duna Polis permiso pa listra den su camber y nan a kibra tur cos den e camber y despues bay den camber di e mama tambe. L.M. a bisa Hues cu e ta compronde cu Polis mester haci investigacion pero esey no ta sistema.

   FISCAL:

Fiscal a bisa Hues cu L.M. ta desmenti cu el a menaza hende. El a bisa cu tin un testigo cu tabata cune. A scucha e testigo pero el a desmenti cu e tabata cu L.M. Tin declaracion di O. y su amiga y Fiscal no ta duda den esaki. Fiscal a bisa Hues cu e no ta kere declaracion di L.M.

El a mustra cu menaza di morto ta un asunto serio. Fiscal a tene cuenta cu e recien condena pa maltrato cu arma y destruccion. Fiscal no ta haya cu L.M. mester bay sera. El a exigi castigo di 30 dia di prison di cual 20 dia ta condicional cu un tempo di prueba di 2 aña.

    ABOGADO:

Abogado mr. Sjiem Fat a remarca cu ningun momento e testigo a bisa cu e no tabata cu L.M. El a bisa cu ora L.M. a bay Chines, el a keda den auto. E abogado a sigui bisa Hues cu L.M. ta desmenti categorico di a menaza O. cu morto. Ta asina cu 29 Mei 2019 O. a haci denuncia, Fiscal a keda sin haci investigacion y ta haya cu a perhudica L.M. den un proceso husto.

E abogado a cuestiona e hecho cu Polis a bay di mas door di benta L.M. abao y forza siendo cu L.M. a bisa cu el a caba di haci operacion. Tambe cu a forza portanan siendo cu L.M. a bisa cu por check den su camber. E abogado a mustra cu e declaracionnan di O. y su amiga ta contradictorio.

E abogado ta haya straño cu O. ta un testigo importante den e caso di tiramento riba L.M. Mr. Sjiem Fat a bisa Hues cu L.M. a cambia y a drecha su bida. E ta haya cu no por bay huzga pa su pasado. E ta haya cu mester declara Fiscal no admisibel. El a sigui bisa cu si Hues ta haya L.M. culpable, el a pidi pa duna castigo igual na e 10 dianan cu e tabata sera.

SENTENCIA:

Hues a sera tratamento di e caso y a bisa cu e ta dicta sentencia di biaha. Hues a rechaza ponencia di abogado cu mester declara Fiscal no admisibel pasobra no a busca e imagennan di video for di supermercado.

Pa loke ta e cuestion cu Polis a bay mucho violento, Hues a rechaza esaki. Hues a bisa cu no tin nada di esey den e documentonan di e caso.

El a mustra cu L.M. ta para riba cu e no a menaza. Hues a bisa cu e por compronde cu lo tin un problema relaciona cu e tiramento di L.M. y cu O. lo ta complice.

Pa cu e castigo, Hues a bisa cu e ta tene cuenta cu declaracion di L.M. cu realmente ta mustra cu e kier cambia su bida. 2017 tabata ultimo biaha cu a haci maltrato cu arma. Hues no ta haya cu L.M. mester bay sera den KIA. El a baha e castigo exigi pa Fiscal. Hues a condena L.M. na 20 dia di prison di cual 10 dia ta condicional cu un tempo di prueba 2  aña.

- Advertisement -

DUNA COMENTARIO

Please enter your comment!
Please enter your name here