Home Hudicial Homber tabata laga traha cannabis oil pa calma su yiu autista

Homber tabata laga traha cannabis oil pa calma su yiu autista

505
0
SHARE
- Advertisement -

Hues a reclama con e pareha tin yiu ta drumi den tur e droga ey

ORANJESTAD (AAN): E homber J.W. acusa di plantacion di marihuana entre 2017 y 27 April 2019 y tambe di bende marihuana a haya castigo combina, caminda un parti ta condicional cu un tempo di prueba y un parti ta trabao pa comunidad.

   HELICOPTER DI POLIS A MIRA PLANTACION:

Hues a bisa cu e raport di Polis ta bisa cu dia 24 April 2019, helicopter di Polis a constata cu tin plantacion di marihuana na cas di J.W. A saca potret pa tin esaki como prueba.

Polis a bay haci investigacion na e cas y den un camber tabatin 42 mata colga pa seca. Ademas a haci 18 saco cu yerba. Tambe a haya 150 mata planta. A confisca tur esakinan y tambe tur e cosnan cu a usa pa planta. A confisca placa mas o menos 1300 Florin y 20 Dollar, cellular. J.W. a admiti di planta marihuana. El a bisa cu e ta cria galiña pa bende webo y tin plantacion di marihuana.

   USA CANNABIS OIL RIBA SU YIU:

Segun J.W., e tabata kier a traha Cannabis Oil y ta huma marihuana. E tabata duna e matanan na un persona pa traha Cannabis Oil y esaki e ta duna su yiu autista pa calm’e y drumi bon. J.W. a bisa Hues cu e no ta bay bisa nomber di e persona cu tabata yud’e.

Hues a sigui bisa cu J.W. a bisa Polis cu e ta usa marihuana pasobra esaki ta dun’e energia pa traha bon. El a siña pa traha Cannabis Oil door di bay cerca e persona cu ta haci’e p’e.

    BENDEMENTO DI MARHUANA:

Ora Hues a puntra J.W. tocante bendemento di marihuana, J.W. a para riba cu e no ta bende marihuana. Hues a remarca cu e pareha di J.W. a bisa cu nan ta usa y cu J.W. ta bende. Segun J.W. e ta duna marihuana na amistadnan cu ta yud’e cu e plantacion pero no ta bende.

Segun J.W. e placa cu a haya na su cas ta parti di su salario cu el a lanta y placa di bendemento di webo. E 20 Dollar el a haya for di su mama pa su yiu. El a para riba cu e placa no ta di bendemento di marihuana. Hues a mustra cu riba J.W. su cellular tin hende ta papia di prepara un cos di 10 y otro ta papia di un cos di 100, un otro papia di un cos di 50. J.W. a bisa cu esey ta marihuana pa huma. Hues a menciona diferente mensahe cu ta papia di cos di 100. Tur esaki ta indicacion cu e tabata bende. Hues a mustra cu den pasado caba J.W. a haya castigo pa marihuana.

   EXIGENCIA DI FISCAL:

Fiscal ta mustra cu aki ta trata di hopi droga. Pues 205 mata a keda confisca. En total 2.5 kilo di marihuana a keda confisca parti den diferente saco. Fiscal a bisa cu e ta tene cuenta cu den pasado J.W. a haci castigo pa marihuana. Fiscal a remarca cu J.W. ta para riba cu e no ta bende pero su partner y mensahenan di chat ta mustra cu si e tabata bende.

Fiscal a exigi 6 luna di prison condicional cu un tempo di prueba di 3 aña. Tambe Fiscal a exigi 240 ora di trabao pa comunidad y si no cumpli cu esaki J.W. lo mester bay 120 dia sera den KIA. Fiscal a bisa Hues cu e placanan por bay back pa J.W.

   ABOGADO:

Abogado mr. Edwards a bisa Hues cu el a haya e procesverbaal for di Ministerio Publico, un dia promer. El a bisa cu e famia di J.W. ta bayendo hopi bon. E ta trahando keto bay na e compania cu e ta trahando. El a pone loke a sosode un banda y ta dedica na galiña y cria porco. E abogado a bisa Hues cu e placa cu a keda confisca por mira claramente cu un parti di e placa a haya den su cartera y otro den un saco. E abogado ta haya cu no por bisa cu e placa ta di bendemento di droga.

El a bisa Hues cu e tin prueba cu J.W. a lanta placa for di su salario. E placa den saco ta di bendemento di webo di galiña. E ta haya cu e suma cu a confisca mester bay back pa J.W. E abogado ta haya cu e castigo condicional y tempo prueba 3 aña un poco halto.

    SENTENCIA:

Hues a sera tratamento di e caso y a dicta sentencia di biaha. Hues ta haya legalmente proba cu J.W. tabatin plantacion y bende marihuana y tabatin droga den poder. Hues a tene cuenta cu e carchi di castigo caminda J.W. a yega di cay sera caba pa marihuana.

Hues ta haya e castigo exigi pa Fiscal na su lugar. El a condena J.W. na 240 ora di trabao pa comunidad kitando e periodo cu e tabata sera. Esaki bou guia di Reclasering cu lo fiha oranan cu J.W. lo mester traha. Si J.W. no cumpli cu e trabao pa comunidad, lo mester bay 120 dia sera.

Hues a condena J.W. na 6 luna di prison condicional cu un tempo di prueba di 3 aña. Hues a hala J.W. su atencion cu e ta spera cu J.W. lo stop y con por ta cu nan ta laga mucha drumi den tur e droga aki. J.W. a bisa Hues cu e lo percura pa no haci’e mas.

- Advertisement -

DUNA COMENTARIO

Please enter your comment!
Please enter your name here