Home Enseñanza ‘Homeschooling’ no ta viola leynan di Enseñanza Obligatorio

‘Homeschooling’ no ta viola leynan di Enseñanza Obligatorio

593
0
SHARE
- Advertisement -

Minister Rudy Lampe cu maneho nobo:

ORANJESTAD (AAN): Diahuebs durante un conferencia di prensa Minister di Enseñanza, Ciencia y Desaroyo Sostenible Rudy Lampe a papia riba un maneho nobo yama: ‘Scholing op een andere Locatie’.

“Como Minister di Enseñanza ta un placer pa anuncia un maneho nobo, cu por wordo traduci como Educacion na un otro Localidad”.

“Nos tur sa cu nos tin e ley di Enseñanza Obligatorio y den nos maneho y interpretacion di e ley aki, e enfasis ta riba e hecho cu e mucha, e studiante tin derecho riba educacion, pues e mucha ta central”.

“Pesey pa nos e ta un derecho sagrado”.

Esaki segun Lampe, kende a sigui bisa cu e obligacion ta bin di parti di Gobierno y di parti di nos adultonan.

“Pesey nos kier anuncia aworaki cu educacion di e mucha no necesariamente mester keda realiza fisicamente dentro di e murayanan di e school tradicional”.

“Bo por cumpli cu e derecho di e mucha riba educacion sin cu bo ta pensa solamente riba e school fisico tradicional y pesey nos kier anuncia cu nos ta autoriza diferente experiencia di educacion cu ta tumando lugar pafo di e muraya di e school tradicional”.

Esaki segun e mandatario, kende a sigui bisa cu e subtitulo ta papia di un ambiente di siña digital.

“Pesey aworaki nos a autoriza muchanan cu ta hayando ‘homeschooling’, pues un mayor cu pa ‘x’ motibo hustifica a dicidi cu ta mihor pa su yiu haya ‘homeschooling’, esey no ta viola nos ley di Enseñanza Obligatorio”.

Esaki segun e minister, kende a indica cu si un mucha haya les na cas, esaki ta completamente legitimo dentro di e maneho nobo cu a wordo firma.

E mandatario a sigui bisa cu tin muchanan cu ta inscribi na un centro educativo cu 1 maestro, incluyendo muchanan cu autismo cu no por funciona den un klas tradicional, cu ta hayando educacion no na un school tradicional.

Esakinan ta completamente legal y no ta viola e ley di ‘leerplicht’.

E minister a splica tambe cu tin muchanan cu ta sigui asina yama ‘Virtual Schooling’ y na Aruba tin un centro educativo cu ta ofrece esaki tambe.

El a indica cu esaki tambe ta legal.

Nan ta usando un programa di New York, unda cu e mucha ta bira un avatar y e maestronan cu e ta topa ta avatar.

“E programa aki tambe ta autoriza y legal, pasobra e ta cumpliendo cu e ley di leerplicht”, segun Lampe.

El a splica cu tin casonan tambe unda cu un mucha ta inscribi na Colegio San Nicolas, pero no ta bay Colegio San Nicolas.

Locual ta wordo hasi ta cu nan ta bay otro localidad, unda cu nan ta ricibi tur e material educativo di Colegio San Nicolas, nan ta ricibi coaching di e maestro di Colegio, pero fisicamente nan no ta asisti na e school.

Nan ta haya guia na un otro localidad y esey tambe ta conta cu apoyo di e minister.

 

 

- Advertisement -

DUNA COMENTARIO

Please enter your comment!
Please enter your name here