Hues a compronde cu Douaneronan ta rabia y a laga nan sigui welga henter Diaranson

    292
    0
    SHARE
    - Advertisement -

    Diahuebs mainta 6:00 am e welga mester stop

    ORANJESTAD (AAN): Gobierno a keda sorprendi cu e Welga di Diaranzon mainta di Douaneronan na Aruba.   E pensamento di nan ta cu e anuncio tabata demasiado riba man, y no a ni duna Gobierno ni Ministro un chens di haci algo.

    Esaki, hunto cu e hecho cu cada dia cu Douane keda riba welga e por nifica perdida di 1 miyon Florin den caha di Gobierno, a pone cu Gobierno a entabla un caso sumario contra Sindicato SADA, cu ta representa e Douaneronan.  Esaki a tuma lugar Diaranzon atardi 4’or.

    E atardi aki a bira conoci, cu tanto Camara di Comercio (KvK) como tambe Asociacion ATIA a uni nan mes na e caso sumario aki contra Douaneronan.  Esey ta debi cu e consecuencianan di e welga ta afecta comercio y industria di e isla grandemente.  Specialmente considerando e hecho cu apenas Diamars e barco di carga a caba di yega.

       GOBIERNO SORPRENDI:

    Henter Diaranzon durante e dia di welga, ningun container a wordo procesa, y no por a sali for di Waf di Barcadera.

    Gobierno a presenta cu su abogadonan di DWJZ, kendenan a splica cu despues di e Convenant (“acuerdo”) a wordo firma na Juli 2017 entre SADA y Mandatarionan anterior, e Gobierno nobo na November 2018 a manda pidi conseho al respecto di Raad van Advies.

    Raad van Advies a duna conseho negativo den un rapport emiti 12 December 2018 cu si acaso Gobierno sigui cu e deal aki, e lo por trece un precedente indeseable cu consecuencianan.

    Despues di esey, Gobierno a manda busca 4 conseho mas riba e asunto aki, pues 2x di Departamento di DRH, y tambe 2x di Departamento di Wetgeving.  Tur a duna conseho negativo.

    Y pesey mes dia 9 di September finalmente Ministro Xiomara Ruiz-Maduro a notifica SADA cu nan no ta sigui cu e Convenant aki, como cu e Functiehuis y Salarishuis lo tin consecuencia pa Gobierno.

    Diamars 10 di September pa 7:00 pm, SADA a informa Gobierno cu miembronan a dicidi cu nan a fada y ta bay den welga entrante Diaranson 11 September pa 8:00 am.

    E welga aki a pone cu henter dia no tabatin Douanero na Waf, y no por a atende ningun Container.  Mesun cos cu Aeropuerto pa controla pasaherona cu a yega, y na e seccion di Cargo tampoco tabatin personal pa yuda vrijmaking di carga.  Tur esaki tabata pone Gobierno perde como 1 miyon Florin pa dia.

    Gobierno ta culpa Sindicato di a bay welga y comete daño ireparable na economia, y pesey KvK y ATIA tambe a uni na esey, y ta hasta yama esaki un “wilde staking”.  E gremionan a bisa cu hasta prome cu welga caba, e retrazonan di Douane pa laga carga sali liber, ta hopi stagna.  Riba Diaranson el a empeora.  Exigencia di Abogadonan di Gobierno ta pa Hues ordena un paro na e welga, sino laga nan paga 250.000 Florin pa cada dia cu nan keda sin bay bek trabao.

       ABOGADO DI SADA:

    Abogado mr. De Sousa a representa Sindicato SADA na un forma extenso a mustra con den Gobierno no mag di tin discrepancia entre e Servicionan Uniforma.  El a mustra cu awor Ministro ta bisa cu e lo no por ehecuta Functiehuis ni Salarishuis di Douaneronan, siendo cu Cuerpo di Bombero y tambe KPA Polis si tin esaki.

    El a mustra tambe con di 2016 caba a cuminza traha riba e Convenant aki, cu realmente desde 1 Januari 2017 mester a drenta na vigor.  Pero a keda wanta esaki y den 2017 a cuminza papia di Periodieke Uitkering, y finalmente a firma e convenant na Juli 2017.

    Abogado a cuestiona e hecho, cu awor numa a bin haya sa cu desde 12 December 2018 caba Raad van Advies a duna conseho pa no sigui cu e deal aki.  Douaneronan kier sa, di con Ministro Ruiz-Maduro a keda tene nan na linea tur e lunanan cu a pasa?  Y te awor riba 9 di September 2019 e ta bisa cu no ta honra e Convenant mas?  Di con mester a warda 9 luna largo y tene SADA na linea.  Siendo cu cada rato den e reunionnan di 2019, ningun rato a bisa nan di e conseho negativo.

    Segun Abogado, intencionalmente Ministro a gaña SADA tur e tempo ey, pa awor na September bin bisa cu ehecucion di e convenant lo trece consecuencia negativo.

    Abogado a bisa tambe cu Douaneronan a compronde cu na 2018 caba, Parlamento di Aruba a aproba e placa aki pa Douane den tratamento di Presupuesto.  Pesey nan ta sorprendi cu awor Gobierno kier bin bisa cu no tin placa.

    Segun mr. de Sousa, e convenant aki entre Gobierno y SADA ta forma parti di acuerdonan duro haci.  Pero awor Gobierno ta mustra cu tin un plafond impone door di CAft y Hulanda pa e gasto salarial na Aruba.

    Abogado aki a agrega, cu CAft a impone tambe decision cu Gobierno tin di reduci personal y no tuma mas hende den servicio.  Pero tin indicacion cu keto bay Gobierno ta sigui tuma hende.  Pero pa e Douaneronan no tin placa.

    E representante di SADA a subraya, cu si acaso Gobierno ta haya cu Douane ta un Departamento esencial, e ora pues e tin di percura pa e acuerdo wordo cumpli y e Douaneronan haya e bezoldiging cu nan merece.

    Hues a puntra di con prome cu bay den welga, SADA y Gobierno no por a sinta na mesa?  Aki e contesta ta cu pa como 1½ aña caba e Douaneronan ta warda y reuni riba e asunto aki.  Douaneronan tabatin hopi pasenshi y tabata kere e promesanan di Ministro.  Pero awor nan pasenshi a caba, y a fada.  Pesey a bay riba welga.

       SENTENCIA DI HUES:

    Den su sentencia, Hues mr. Sap a tuma na consideracion cu e momento ey ya caba 6:00 pm ta bay bati den Corte di Husticia, pues e ‘dagdienst’ di Douane ta tras di lomba.  El a splica cu e ta compronde cu Douaneronan ta rabia, y el a dicidi pa laga nan sigui welga henter Diaranson.  Pero a dicta cu Diahuebs 12 di September pa 6:00 am, e Douaneronan mester cuminza traha bek.  Pues Hues a duna OK pa esnan di Avond Dienst y Nacht Dienst tambe sigui welga.

    Hues a mustra cu semper ora di Welga, tin reglamento di wega cu bo tin di tene cuenta cune, y principal cu e tin efecto grandi pa henter e isla.  Esey ta inclui cu no por anuncia un Welga pa tempo indefini, y tin di pone un duracion di ora pa Welga.  El a bati riba dede di Sindicato tambe riba e forma di anuncia e Welga, unda no a duna Gobierno ni un chens pa reacciona.

    Aki Hues a bisa cu e ta compronde e trayecto largo y speranza di e Douaneronan tabatin cu e Convenant, y awor cu Gobierno no kier honra e deal ey mas, e ta crea incertidumbre den e seriedad di Gobierno.  Pero Hues a agrega mesora cu esey ta algo cu e lo no bay toca den e sentencia di e Caso Sumario aki.

    Sinembargo e ta pidi tur dos banda pa bay den un Cooling-Off Period, pa asina start cu combersacionnan nobo.  E ta haya cu e dos partidonan mester bay papia trankil cu otro, pa laga Mediador di Gobierno pone nan na mesa.

    Hopi di puntonan presenta dilanti Hues, ta algo cu un Caso Sumario no por atende, y mas bien eseynan ta pa Caso di LAR.

    Toch Hues a manda nan bay traha bek Diahuebs mainta 6:00 am, y pa cada dia cu Sindicato keda sin bay traha, tin di paga 100.000 Florin na multa, te na un maximo di 1.5 miyon Florin.

    Tambe den e Cooling-Off Period aki, Hues a stipula cu SADA no mag di welga tampoco di awor te cu 12 October 2019.  Si acaso no cumpli cu esey, e mesun multa ta aplicable aki.

     

    - Advertisement -

    DUNA COMENTARIO

    Please enter your comment!
    Please enter your name here