Home Hudicial Hues a declara liber homber acusa di menaza cu cuchio

Hues a declara liber homber acusa di menaza cu cuchio

84
0
SHARE
- Advertisement -

Defensa di abogado mr. Scheper a trece duda completo

E doño di e cas lo wordo persigui pa a corta e sospechoso formal

ORANJESTAD (AAN) – Ayera mainta e homber O.D.T. a presenta dilanti Hues pa 4 caso penal cu Ministerio Publico a cuminsa contra dje. E casonan ta varios: di ladronicia cu menaza, menaza cu cuchio, menaza cu schroefdraai y tabatin un Iphone horta. Fiscal a exigi 15 luna di prison pa tur e casonan aki.

Abogado mr. Scheper cu a defende O.D.T. pa e caso di menaza cu cuchio, a mustra cu no tin prueba convicente y a pone Hues duda kico realmente a pasa na e cas. Hecho ta cu O.D.T. cu a drenta e cas cu un Stanley mes, a resulta severamente herida door di e doño di e cas cu a cort’e varios caminda cu un machete.

Ariba pregunta di Hues, Fiscal a bisa cu lo bay cuminsa un caso contra e doño di e cas. Hues a declara O.D.T. liber pa e acusacion di menaza di cuchio pero pa tur e otronan, e ta haya e 15 luna exigi pa Fiscal hopi rasonabel y a condena O.D.T. na 15 luna di prison.

MENAZA CU CUCHIU

Hues a mustra cu segun e procesverbaal di Polis, dia 17 December 2018, O.D.T. a menaza e homber C. cu cuchio. O.D.T. a bisa Hues cu el a wordo corta na su cabez patras y nek y mester a wordo cosi. Hues a bisa cu C. a declara na Polis cu dia 16 December 2018 O.D.T. a bay su cas y tabata agresivo pasobra e tabata sospecha cu C. lo tin relacion cu su amiga. Segun C., e conoce O.D.T., kende e tabata huur un cuarto y cu O.D.T. tabata usa piedra di cocaina.

Ariba pregunta di Hues si O.D.T. ta usa droga, el a bisa Hues cu awor e ta usa marihuana so. Hues a sigui bisa cu C. a yama Polis dos biaha pa bay eynan pasobra e no tabata confia O.D.T.     Su siguiente dia, 17 December 2018, O.D.T. a bolbe cay na cas di C. pasobra el a kere cu su amiga tabata eynan.

Segun C., O.D.T. tabata agresivo y a forza porta y drenta e cas. El a coy un machete den e cas y tabata zwaai cu esaki den direccion di C. E momento ey C. a core bay den camber y O.D.T. su tras. O.D.T. a zwaai cu e machete y C. a kita y e machete a kibra algun shutter di bentana. E momento ey C. a pasa man pa un cuchio y a hinca O.D.T. diferente biaha. E no sa na unda el a hinca O.D.T. pasobra tabata scur. O.D.T. a core bay y C. a yama Polis. Den e cas a haya hopi mancha sanger.

Segun O.D.T. el a drenta e cas y tabata busca C. cu a bay sconde. El a bay den e camber y bou di e cama el a mira C., kende a atak’e y hink’e varios biaha cu cuchio. E ora ey O.D.T. a core bay. Hues a mustra O.D.T. potret di e diferente cuchionan cu a haya den e cas y O.D.T. a reconoce e Stanleymes cu ta esun di dje. El a reconoce tambe e machete cu C. lo a cort’e cun’e. Hues a conclui cu den e cas a mira hopi mancha di sanger y O.D.T. a wordo severamente corta.

Ariba pregunta di Hues, kico Fiscal tin pensa di haci cu C., Fiscal a bisa cu lo bay persigui C. pa e forma con a corta O.D.T.

EXIGENCIA DI FISCAL

Fiscal ta haya tur e acusacionnan proba. Pa loke ta e caso di menaza cu cuchio, Fiscal a bisa cu e homber C. a maltrata O.D.T., door cu O.D.T. a bay den e cas cu un cuchio.

Pa cu e castigo, Fiscal a bisa cu e ta tene cuenta cu na 2017 a condena O.D.T. pa maltrato severo. El a haya castigo condicional di 1 aña cu un tempo di prueba di 1 aña. Fiscal ta haya cu O.D.T. a haci e delito aki den su tempo di prueba y na November 2019 e lo bin cu un caso pa exigi e 1 aña di prison aki riba e castigo cu Fiscal a exigi. Fiscal a exigi 15 luna di prison kitando e tempo cu O.D.T. ta sera.

DEFENSA DI ABOGADO

Abogado mr. Schepper ta haya cu no por prueba cu O.D.T. a zwaai cu machete riba C. y a destrui shutter di bentana, manera C. a declara na Polis. Na opinion di e abogado, ta solamente declaracion di C. tin contra O.D.T. Ley ta bisa cu mester tin prueba convicente y e abogado ta haya cu den e caso aki no tin. El a mustra cu O.D.T. ta bisa cu ta C. a saca machete p’e. El a resulta herida severamente door di C. na parti patras di cabez, orea y elleboog.

E abogado ta haya cu no por saca for kico a causa e confrontacion aki. Segun mr. Scheper, no por bay solamente tras di dos declaracion. E ta haya cu mester tin pruebanan convicente. El a mustra cu e camber cual ta papia di cu O.D.T. lo a zwaai cu machete, e shutternan ta tapa cu palo, pues esey no por a wordo haci door di O.D.T. E ta haya cu mester declara O.D.T. liber di e acusacion aki.

SENTENCIA

Hues a pospone e caso un rato pa pensa si e ta dicta sentencia di biaha cu tur e casonan. El a bolbe y a bisa cu e ta dicta sentencia pa tur e casonan. Hues a bay riba e caso di 17 December 2018 caminda O.D.T. a menaza e homber C. cu cuchio. Hues ta haya cu tabatin confrontacion pero no por bisa kico realmente a sosode. Mirando e heridanan severo cu O.D.T. a sufri, Hues a bisa cu e tin duda y si un Hues tin duda, e mester declara O.D.T. liber pa e acusacion aki. Pa loke ta e otro acusacionnan, Hues ta haya O.D.T. culpable y a conden’e na e 15 luna di prison cu Fiscal a exigi.

 

- Advertisement -

DUNA COMENTARIO

Please enter your comment!
Please enter your name here