Home Gobierno Institutonan di Aruba y Unidad di Asilo lo wordo fortifica via donacion...

Institutonan di Aruba y Unidad di Asilo lo wordo fortifica via donacion di 10.9 miyon di Hulanda

26
0
SHARE
- Advertisement -

Minister Presidente gradici cu e bunita gesto:

ORANJESTAD (AAN) – Den conferencia di prensa di gobierno, Minister Presidente mr. Evelyn Wever – Croes, a bolbe referi na e ayudo financiero cu Hulanda a aporta Gobierno di Aruba Diabierna ultimo,  cu ta un suma di 10.9 miyon florin, relaciona cu e situacion dificil na Venezuela y su efectonan pa Aruba.

E mandatario a menciona cu debi na e situacion aki y su impacto riba Aruba, ya na Mei caba el a biaha pa Hulanda den cual el a reuni cu Premier sr. Mark Rutte, y cu e Secretario di Estado sr. Raymond Knops.

E dignatario tambe a pidi audiencia cu e Comision di Reino di Eerste y Tweede Kamer, el a reuni tambe cu Raad van Staten y cu diferente stakeholders riba e tema aki.

El a splica nan cu e impacto riba Aruba ta grandi, multiple y riba diferente tereno. No solamente riba e asunto di imigracion cu ya ta un problema hopi grandi, pero tambe riba e terenonan di infrastructura, enseñanza, salubridad, social, seguridad y e tabata grato pa tuma nota cu Hulanda a dicidi di pone un suma disponible pa Aruba, Bonaire y Corsow por combati e crisis di Venezuela den nos pais.

Hulanda a haci e anuncia simultaneamente na e islanan ABC, Diabierna ultimo y na Hulanda cu e ayudo ta wordo concede y cu Aruba ta bay haya 10.9 miyon.

E suma aki no ta placa pa Venezuela. E ta un ayudo pa Aruba pa por fortifica nos Institutonan mas, y e tin cu bay pa e metanan specifico y nada otro.

Esaki ta pa fortalece mas nos fronteranan, haci mas patruyahe y pa yuda Aruba cu imigracion pa atende cu e fluho na un manera mas agil, y pa yuda e Unidad di Asilo.

Minister Presidente a duna di conoce cu e cantidad di peticionnan pa asilo a yega mil aworaki, despues cu algun aña pasa tabata dos of tres. Awor tin mil y esey ta haci cu gobierno tin cu atende cu nan, ya cu Aruba ta mara na tratadonan internacional pa haci esaki.

E mandatario a splica cu ya a delega 10 persona den e Unidad di Asilo. Nan ta diez persona cu tabata den overtolligheids pool y cu gobierno a trece nan bek for di cas pa asumi un trabao, cual nan ta trahando sumamente bon. No obstante, mil peticion ta hopi pa atende, y pesey e suma aki tambe ta wordo dedica na e Unidad aki.

Den e 10.9 miyon tambe tin ayudo pa Warda Nos Costa wordo fortifica, pa mas cell na warda di polis y na KIA. E dignatario a subraya cu no mester paga e suma aki bek, sino cu e ta un donacion di Hulanda na e Islanan y e ta considera esaki un bunita gesto unda Hulanda ta mustra cu e crisis di Venezuela y su impacto ta wordo reconoci aya tambe.

- Advertisement -

DUNA COMENTARIO

Please enter your comment!
Please enter your name here