Home General Investigacion Refineria di Aruba lo rementa scandal di Citgo

Investigacion Refineria di Aruba lo rementa scandal di Citgo

372
0
SHARE
- Advertisement -

Exclusivo

Sumanan enorme di Aruba den proyecto destina pa fracasa

*Base huridico di Aruba a wordo destrui pa introduci acuerdo

*Aña nobo di Parlamento lo trece revelacion grandi pa Aruba

ORANJESTAD(AAN)–“Durante e aña nobo di Parlamento cu ta cuminsa otro siman,  e representacion oficial di Pueblo di Aruba lo mester trata asuntonan relaciona cu Citgo, cu a wordo teni scondi pa pueblo di Aruba na 2016 ora contra ley gobierno Mike Eman a introduci e proyecto. ”

Manera den su edicion di ayera DIARIO a indica, informantenan clave cu a guia DIARIO den e proceso pa informa Aruba riba tur desaroyo rond di refineria, a indica cu Parlamento di Aruba ta dilanti un aña cu lo revela hopi asunto cu a wordo teni secreto pa Aruba.

Informantenan di DIARIO semper a insisti pa un investigacion wordo haci di tur loke tin relacion cu e refineria di Aruba.

Prome cu revelacion di e contract cu internamente politiconan di AVP a regla pa Richard Arends na Refineria di Aruba a mira luz, DIARIO ya a informa pueblo do Aruba cu e contracto mester wordo investiga.

“Ta exactamente tres aña cu un suceso nunca bisto den historia di Aruba a wordo registra ora gobierno Mike Eman a nenga di laga miembronan di Parlamento di Aruba tuma nota di contenido di e contracto cu a cera cu Citgo,” a wordo treci dilanti na DIARIO.

“Ta trata aki di un acto completamente ilegal ya cu Parlamento mester studia tur loke e mester trata den Parlamento na nomber di pueblo. Esaki sinembargo a sosode despues cu gobierno Eman a firma e acuerdo na forma ilegal cu Presidente Nicolas Maduro. Ningun gobierno por mara Aruba na un acuerdo financiero sin aprobacion di Parlamento. Den e caso di Citgo, gobierno Mike Eman a mara e pais na un acuerdo cu un regimen Venezolano cu cantidad di riesgo pa e pais,” a wordo treci dilanti atrobe.

E fraccion di AVP no a coregi su lider pero a duna sosten na Mike Eman na un forma ciego, sosteniendo asina e proyecto na forma ciego.

“E proyecto di Citgo a percura pa e desastre di Aruba. Placa a wordo gasta pa loco cu biahamento y preparacionnan pa loco cu e proyecto cu a hinca Aruba den un crisis economico cu hunto cu e crisis financiero tin Aruba den e problemanan actual,” informantenan a splica.

Na Maart 2018 cu cambio di Gobierno, Parlamento a ricibi e documentonan di acuerdo Citgo y por a cuminsa tuma nota di tur loke a wordo regla pa tur e companianan cu Gobierno a introduci tambe.

Awor tur berdad ta bay sali na cla, manera informantenan a indica na DIARIO. Den e aña nobo di Parlamento hopi caso mas lo wordo atendi ora e berdad di e proyecto Citgo bini dilanti.

“Aruba a paga y ta paga un prijs sumamente halto pa e proyecto di mayor abuso den historia di Aruba,” a wordo splica na DIARIO, cu por comprende cu ta hopi placa di Aruba a wordo malgasta den supuesto preparacion pa un proyecto cu tabata destina pa fracasa.

“Prueba ta cu te awe ta problema so tin cu Citgo y gobierno Eman tabata sa kico tabata a punto di rementa pasobra e tabata tin contacto directo cu Citgo,” a wordo treci dilanti.

- Advertisement -

DUNA COMENTARIO

Please enter your comment!
Please enter your name here