Opinion Publico
ORANJESTAD (AAN): Un automobilista a indica na DIARIO, cu ultimo tempo e fila di auto cu ta keda pega riba Avenida Nelson Oduber na altura di e rotonde cerca di Eagle Bowling, ta insoportable.
E ta referi na trafico cu ta bin for di riba Avenida Nelson Oduber bayendo panort, pero na e rotonde grandi banda di Eagle Bowling ta bira pa asina subi e caminda di Pos Abao pa Kibaima.
Aki e trafico ta stagna hopi, debi na e situacion na e rotonde chikito cu tin net un tiki mas pariba, cu den pueblo ta conoci como “Rotonde di Texaco Sasaki”.
E automobilista a indica cu ta tur dia trafico ta pega asina, y e ta mira cu ainda ningun ingeniero kier haci algo pa drecha e situacion.
E mes ta sugeri pa hancha e pida caminda entre e Rotonde grandi y e Rotonde chikito y pone un extra via cu ta bay direccion pariba. Y e extra via aki ta special pa trafico cu na e rotonde chikito lo “slaat af” direccion drechi pa asina drenta Schotlandstraat bay zuid.
E automobilista ta convenci cu e coreccion aki y crea un via extra, lo por yuda alivia e trafico na e cruzada aki pa semper. El a pidi pa DIARIO pone su reaccion pa asina mira si kizas esnan di DOW y tambe Ministerio di Gobierno lo por ta di acuerdo cu su solucion.
