ORANJESTAD (AAN) – Diahuebs 12 di september 2019 Camara di Comercio y Industria di Aruba (KvK) ta organisa un Town Hall Meeting riba e topico di Reforma Fiscal.
E evento lo tuma luga den auditorio di KvK di 6:00 PM pa 8:00 PM. Pueblo henter y en particular e comerciante ta keda cordialmente invita pa ta presente pa comparti idea y bin cu solucionnan pa e Reforma Fiscal.
Durante e Town Hall Meeting KvK lo presenta algun topiconan cu ta forma parti di e Reforma Fiscal y di e forma aki duna e publico presente e oportunidad pa elabora riba solucionnan cu lo beneficia pueblo di Aruba. E topiconan cu lo wordo presenta:
– Menciona BBO riba e recibo
– Cobra BBO na frontera
– Introduci Sugar Tax
– Bronheffing riba salario di directiva/management y derecho di autor (royalties)
E motibo di e Town Hall Meeting ta pa KvK haya bista di kico ta e preocupacionnan y kico pueblo mes ta considera como e miho solucion cu tin cu wordo inclui den e Reforma Fiscal.
Lo tin un moderador cu lo guia e evento na papiamento pero publico presente por trece su puntonan dilanti na papiamento, hulandes, ingles of spaño.
Si acaso bo tin punto cu bo kier trece dilanti prome cu e Town Hall Meeting of si bo no por ta presente por e-mail esaki pa businessinfo@arubachamber.com.
Tene cuenta cu cupo ta limita y pa e motibo aki ta pidi pa registra na tempo.
