Vocero di City Inspector Robby Rosel:
ORANJESTAD (AAN)—Actualmente, Bureau City Inspector ta hayando hopi melding y mas tanto relaciona cu awa di beerput cu ta bin ariba, den e centro di Oranjestad.
Asina Robby Rossel a indica den entrevista cu DIARIO. El a duna di conoce cu hopi persona ta laga awa di beerput bay riba caminda, y esey no ta permisible.
Tin un ley cu ta data di basta añanan atras caba, cu ta prohibi haci esaki den dia y anochi, pero tin hopi hende cu ta uza e awa aki den oranan di anochi y ta pasa riba e ley.
Tin hende ta uza e awa di pos pa muha mata pero esaki ta dañino pa salud di e hendenan biba den e vecindario.
Rossel a haci un suplica na cada persona cu ta haci uso di awa di pos pa tene cuenta cu tin e posibilidad pa Cuerpo Policial dune un boet pa esaki.
Biniendo bek riba e awa cu ta core riba caminda, mester tene cuenta cu esaki ta pasando hopi actualmente, y ora autonan ta core tin hendenan cu ta canando cant’i caminda, e awa sushi ta spuit riba hende.
Hopi biaha e awa sushi aki ta keda para dilanti cas di famia. Tambe a ripara cu un tubo a kibra dilanti Oficina di Belasting e parti di number, y esaki a saca hopi awa sushi di e rioolering, cu mester core bay pa lama, pero danki Dios el a tuma contacto cu e persona encarga na DOW y nan a prepara pa bay haci reparacion di e tuberianan aki, pa e awa y mal holo no sigui sali.
Rossel a haci un yamada na comunidad di Aruba, no solamente den areanan habita, pero pero den e partinan pafo di centro, ya cu tin hende ta gusta saca awa di pos, pa no paga e trucknan cu ta haci pos limpi, pero pa yama City Inspector pa nan yama un di e trucknan cu ta haci e trabao aki, pasobra si polis ta haya nan haciendo esey nan ta haya un boet riba dje.
City Inspector ta haci su trabao cu ta percura pa e aspecto di higiene di nos pais, y parti boet ta keda den man di KPA, pa den e casonan menciona papia cu e personanan of duna nan multa.
