Natasha Silva, Chief Conservation Officer na FPNA
ORANJESTAD (AAN): Adolf Franken ta Supervisor di Mantencion na Parke Nacional Arikok ta un di e personanan encarga den e ehecucion di e proyecto Hardin Botanico na e parke.
Durante e firma di e acuerdo diahuebs mainta, el a duna di conoce cu e proyecto aki ta pa yuda educa e muchanan di scol preparatorio SPO pa nan proyecto den Vierde Klas. E vierde klasnan ta bay parke pa core un stage. Na Parke Arikok lo prepara nan pa nan por sa con pa planta un mata y tur e detayenan cu esaki ta encera.
Den futuro, e hobennan aki lo por ta un hardinero y nan por haya trabao den cualkier lugar incluyendo parke mes pa nan mesun progreso y pa nan mesun educacion, a señala.
Franken a bisa cu nan ta hopi contento ya cu tin hobennan trahando den parke cu sa hopi di loke ta hardin y con pa planta e matanan local.
Cu e proyecto aki e hobennan lo haya material y guia pa nan progreso, a agrega.
Banda di esaki, Natasha Silva, Chief Conservation Officer na FPNA a splica cu esaki ta un proyecto hopi importante. Ta bay dura algun luna prome cu nan tin e programa den detaye, con ta bay sigui cu e studiantenan y con lo sigui desaroya nan conocimento di planta mata. Tambe lo wak con ta desaroya nan area profesional.
Silva a laga sa cu lo tarda un 10 aña pa yega na un hardin botanico nacional. E ta bay pasa den algun fase, ta un proyecto bunita y e studiantenan como comunidad lo yuda tambe crea e proyecto aki.
