Mayoria den Parlamento tabata complice creacion crisis actual

    583
    0
    SHARE
    - Advertisement -

    Reino tin prueba cu e no por confia control sagrado di Parlamento 

    *Sistema di control di Aruba silencia durante gobierno anterior

    *Parlamento mester a baha gobierno anterior ora e tabata kibra ley 

    ORANJESTAD  (AAN) — “Parlamento tin rason ora e mustra cu e tin e deber di tuma decisionnan con ta atende cu e crisis cu a wordo ocasiona na Aruba. Di su banda Hulanda por pone prueba riba mesa pa demostra cu Reino no por acepta palabra di Aruba mas y mester tene su mes na e garantianan di Statuut.”

    Esaki ta declaracionnan di informantenan na momento cu Aruba ta prepara pa atende cu Reino y enfrenta e decision si Reino ta tuma medida y interveni den e maneho financiero di Aruba.

    E momento a yega pa Aruba mustra Reino con e ta bay soluciona e actual problemanan economico, financiero y social actual cu ta mishi cu tur otro aspecto di comunidad.

    Informantenan a mustra DIARIO cu ta hustamente pa situacionnan manera Aruba a conoce,  den e leynan basico di e pais inclui e posibilidad pa Reino garantisa cu bienestar di e pueblo lo wordo sirbi.

    “Segun nos cuadro legal en berdad no mester di supervision Hulandes. Si awor Hulanda por papia di supervision ta pasobra politiconan local no a honra e cuadro di ley cu ta garantisa bienestar di e ciudadano,” a wordo mustra.

    “Den constitucion e bienestar di e ciudadano ta central. Esaki ta nifica cu e maneho financiero, economico y social ta garantisa cu e ciudadano tin tur e posibilidad basico pa e por hiba un bida aceptabel. Na e momento aki gobierno no tin placa pa debidamente cumpli cu e exigencia aki pasobra e gobernacion cu a wordo hiba dor di gobierno anterior a faya den un bon maneho financiero,” a wordo mustra.

    Hulanda awor ta presenta prueba cu e no por laga na Parlamento pa drecha e situacion pasobra Parlamento a permiti, contra tur conseho huridico, pa e actual situacion wordo crea.

    Miembronan di Parlamento tabata na haltura cu no por a baha BBO. Nan tabata na haltura cu e pakete di Bo Aruba di 1.6 Biyon lo a haci imposibel pa controla kico a pasa cu placa di pueblo. A hiba un maneho di gasta y sigui gasta, manera informacion ta mustra.

    Den e proyecto di Citgo ta hopi placa gobierno anterior a malgasta. Gastonan enorme no a wordo debidamente controla y a permiti gobierno haci loke e kier.

    ” Hulanda tin rapport oficial pa demostra cu Parlamento di Aruba a faya. Parlamento di Aruba cu a sostene Gabinete Eman, no a practica ningun tipo di control y a permiti conscientemente pa desastre wordo crea.”

    Informantenan a indica cu Hulanda mester tin masha confiansa den e actual gobierno y e actual mayoria den Parlamento pa e keda sin interveni y asina habri un porta desastroso pa Aruba.

    “Parlamento di Aruba ta dicidi realmente con ta gasta placa di pueblo. E representacion mayoritario di AVP no a haci su trabou y no a cumpli cu e exigencianan di trabou y asina a haci su mes complice na e abuso di placa di pueblo cu a tuma luga y awe ta hinca Aruba den problema serio,” a wordo indica na DIARIO.

    - Advertisement -

    DUNA COMENTARIO

    Please enter your comment!
    Please enter your name here