Minister Andin Bikker:
ORANJESTAD (AAN) – Minister di Husticia, mr. Andin Bikker, a duna di conoce den conferencia di prensa, den e contexto di su relato en conexion cu su bishita na Washington DC siman pasa, cu el a reuni tambe na Embahada Hulandes, cu representantenan di Departamentonan di Merca cu ta atende cu frontera, y tambe cu pre-clearance. Ademas tabata presente representantenan di Departamentonan di Aruba.
Nan a elabora riba e sistema di “Happy Flow” cual ta worde aplica na Aeropuerto Reina Beatrix pa mas cu dos aña caba, unda cu a base di biometry e persona ta worde reconoci un bez cu e check in na un manera hopi eficiente y no tin nodi para cada bez den un check point.
Na Merca cierto aerolineanan a cuminza aplica e sistema aki for di November aña pasa, y nan ta interesa pa haya cooperacion riba esaki pasobra Aruba ta un di e prome destinonan cu a bin cu proyectonan piloto y ta aplica e sistemanan aki y Minister Bikker ta mira e posibilidad pa traha un proyecto piloto pa nan.
Aruba como destinacion kier percura pa e turista no tin cu para hopi den rij ora ta yega Aruba pero pa agiliza tur tramitacion, pa e yega lihe su hotel y disfruta di e Isla.
El a reitera cu e reunionnan tabata hopi fructifero y hopi avance a worde haci den sentido di cooperacion, y pronto lo sigui amplia riba e proyectonan piloto aki.
