Home Parlamento “Mi tin confianza cu Premier Evelyn Wever Croes lo yega na un...

“Mi tin confianza cu Premier Evelyn Wever Croes lo yega na un bon acuerdo cu Hulanda”

79
0
SHARE
- Advertisement -

Presidente di Staten mr. Ady Thijsen:

ORANJESTAD (AAN) – Den entrevista exclusivo cu Matutino DIARIO a realiza cu Presidente di Staten, mr. Ady Croes, a surgi e comentario cu diferente ciudadano ta bao impresion cu “gobierno ta den e cuerda floho” y cu na dado momento e por cay, debi na tur e presion cu tin y cu e medidanan economico pa alivia e peso financiero di gobierno, ta afectando tur sector y vooral e consumidor y comercio.

Presidente di Staten no ta mire asina. El a señala cu e gobierno aki tin un acuerdo di coalicion, despues di hopi aña cu no tabata tin un coalicion, y e ta un coalicion solido y stabil.

E coalicion ta trahando hopi duro apesar cu por tin diferencia di opinion, y mirando tur e obstaculonan cu gobierno a haya durante su dos prome añanan di gobernacion, mr. Thijsen ta haya cu Gobierno y Parlamento a demostra cu nan ta solido.

“Mi no por bisa cu nos no tin diferencia di opinion. Esey ta politica, y politica algo cu bo no tin un bala di cristal pa sa kico ta bay pasa den futuro. Y e meta nos dilanti ta pa nos cumpli y resolve e problemanan cu tin” mr. Thijsen a remarca.

El a subraya cu ta bin acerca e problema di Venezuela cu ta afectando Aruba, y cu ni un hende a pidi pe, pero gobierno tin cu deal cune.

“Mi a siña, den e casi 15 añanan cu mi tin den politica cu tin hende ta manipula hopi, y purba drenta den mente di e pueblo. Y manera nos sa Aruba ta un pais chikito y tur cos ta bay di biaha, un ta bisa esey otro ta bisa esey…nan ta manipula cu informacion pa influencia hende cu metanan politico”, presidente di Staten mr. Ady Thijsen a subraya.

El a reitera cu gobierno di Aruba ta haciendo su maximo esfuerzo. E mes no ta sinti contento cu mester tuma cierto decisionnan pero nan mester ta responsable pasobra si no, nan por laga e pais aki bay den decadencia y genera mas problema economico, financiero, social y mas criminalidad.

Nan tin cu para drecha e pais, pero den e caso aki e posicion cu Hulanda ta tumando ta crucial. “Nos Parlamento tin un problema cu e posicion cu Hulanda ta tumando, pasobra e no ta respetando nos como Estado di Derecho. Si Hulanda ta kere cu un KB ta bin riba nos e ta un atentado contra nos Estado di Derecho pasobra nan no tin ningun argumento pa bin cune”, mr. Thijsen a señala.

Presidente di Staten a traha un rapport (cu DIARIO a traducie na Papiamento y a publique) cu cual e kier mustra cu Aruba ta bek riba e rails di e train, riba e caminda di bon gobernacion y di bon maneho financiero, locual el a remarca “no tabta tin”!

El a señala cu gobierno a basa su maneho den cuadro di esaki. “Ta bon pa sa cu articulo 43 di Statuto, inciso 1 ta hopi importante den e caso aki. Di con? Pasobra e articulo aki ta bisa cu tur pais den Reino: Hulanda, Aruba, Corsow, Sint Maarten, mester cumpli cu e tres principionan aki:

1- Cada pais mester percura pa tin bon gobernacion.

2- Tin seguridad den e parti hudicial, y

3- “Salvaguardia y defende e derechonan fundamental di e ciudadano”.

Den cuadro di e tres principionan aki gobierno ta canando, segun mr. Thijsen a enfatiza.

“Pero Hulanda no por kere cu e mes a laga e problema escala y gobierno di Aruba den un aña y mey pa dos aña mester keda cla cu tur cos, anto e no ta compronde nos pueblo y kier caba cu su poder di compra. E tiki cu pueblo tin ainda nan kier pa nos kite for di nan, y esey ta inhusto y no ta na su lugar”.

No obstante, mr. Thijsen tin e confianza cu Premier Wever-Croes lo yega na un bon decision y bon acuerdo cu Gobierno di Reino, pa mustra nan cu Aruba no ta bay acepta cierto cosnan pero cu por yega na cierto acuerdo.

Nan tambe mester compronde cu nan mester a cumpli y nan no a hacie. Un bez mas el a expresa cu “Parlamento ta Parlamento y nan no ta bay acepta pa Hulanda schakel uit nos Parlamento cu ta esun cu ta representa nos pueblo”, Presidente di Staten mr. Ady Thijsen a declara reiteradamente.

- Advertisement -

DUNA COMENTARIO

Please enter your comment!
Please enter your name here