Home General Mike kier gana eleccion nobo pa e no drenta Parlamento

Mike kier gana eleccion nobo pa e no drenta Parlamento

356
0
SHARE
- Advertisement -

Analisis

Mester bolbe vota pa mala fe instiga e pais riba baricada? 

*Generacionnan nobo ta marca pa e calamidad yama Mike 

Esaki no ta momento mas pa palabra bunita. Mala fe politico ta surpasa tur limite normal den un ambiente den cual normalmente politiconan kier briya segun regla democratico.

Sinembargo, loke ta pasa cu Aruba actualmente no tin nomber. Por resumi e situacion actual den algun palabra pa asina pueblo haya oportunidad pa busca solucion pa asuntonan serio di e pais.

Na 2017 e gobierno di Michiel Godfried Eman, tambe conoci como Mike, a clausura un estadia di ocho aña den edificio di gobernacion di Aruba.

Di e forma aki tambe el a bandona e luz publico cu tanto e ta stima, manera henter su carera ta demostra.

Realmente e no mester preocupa su mes cu e posibilidad cu Aruba lo por lubida su persona. E souvenir di debe nacional cu a rementa na forma completo den e petroleo cu nunca Nicolas Maduro a refina na Aruba, ta haci imposibel.

Mike por ta trankil. Aruba hamas lo por lubida su persona. Futuro generacionnan lo corda riba su hazañanan cada bes cu nan mester recorda nan pago na belasting pa sigui deshaci di e debe cu el a pone rond di garganta di Aruba.

Hobennan cu lo biba cu e resultadonan di e actual situacion, cu Mike Eman deliberadamente a planea pa Aruba, un dia lo puntra nan mayornan y educadornan pakico gobierno Mike Eman a kibra nan bienestar.

Pa mala suerte di Aruba, e soñonan di Mike Eman no tin final. Awe cu Aruba mester di trankilidad pa mira con ta sali for di e desastre gubernamental di abuso cu el a laga atras, manera un profeta di mal noticia e ta sigui instiga.

Cu mentira y manipulacion di custumber, e ta sigui crea turbulencia haciendo uzo di hopi cu mester cera nan boca ora e yega pasobra fabornan di un friend mester di pago. Ta pa hopi friend Aruba ta paga actualmente manera husticia ya a proba y den futuro lo mester dicidi a base di rapportnan cu ta mustra kico a pasa cu placa di Aruba directamente.

Actualmente e pregunta cu Mike mes mester contesta ta, pakico e kier pa pueblo  vota pa e drenta Parlamento, si el a demostra na 2017 cu e no kier goberna ni drenta Parlamento.

Na 2017 ora Mike Eman a perde eleccion, el a hala un rosea y sali na careda for di politica. E no tabata kier ta lider di AVP mas, e no tabata kier ta den Parlamento mas. E no kier a forma gobierno.

Nos pregunta ta keda pues: kico Mike kier? Si e kier drenta Parlamento, awor e por drenta. Pasobra eleccion ta pa eligi miembronan di Parlamento. Tur loke e mester haci ta bisa su partido cu esun cu ta riba su stoel mester lanta pa e sinta den Parlamento.

Pero esaki ta loke Mike Eman kier? Kico Mike Eman kier? Destrui Aruba entre eleccion pa eleccion riba baricada si e no haya chens di drenta gobierno y manda Aruba bankroet?

Loke ta pasa na Aruba actualmente no tin nomber. Un homber sin funcion publico, ta manipula pueblo pa asina e por haya voto y bay tene speech rond mundo pa hende bati man.

Mike Eman a marca record den historia politico di Aruba, cu a wordo manipula na antoho di un homber cu solamente por mira su necesidad di poder y atencion manera tur hende a ripara na Aruba.

Pero awor a yega ora pa e laga Aruba trankil. Bay hunga solda den mondi di Cuba cu Nicolas Maduro y laga Aruba na pas!

- Advertisement -

DUNA COMENTARIO

Please enter your comment!
Please enter your name here