ORANJESTAD (AAN)—Den conferencia di prensa di gobierno Dialuna, Minister di Husticia mr. Andin Bikker, a bolbe anuncia cu e radar pa Cuerpo Policial di Aruba (KPA) a yega y otro siman expertonan di e compania fabricante lo bin instala esaki.
E mandatario a declara cu e siman aki e ta wardando cierto ekiponan adicional, cu a keda atras pa motibo di retraso na Miami, door di Horcan Dorian, pero Dios mediante den fin di siman e ekipo aki lo ta na Aruba, y e ora ey e instalacion lo tuma lugar.
E dignatario a expresa cu e gobierno anterior a tuma, como diez aña pasa, e mal decision di no laga KPA tin su propio radar.
Bayendo aworaki pa casi diez aña, e radar cu tabata tin e tempo ey a wordo laga for di servicio y esey ta haci, Minister Bikker a subraya, cu den cierto sentido no tin completamente e ayudo tecnologico necesario.
E dignatario a indica cu Kustwacht tin su radar, pero e falta mantencion y aworaki el a tuma nota cu Hulanda ta bay pone fondonan disponible pa reforza e radar aki.
Pero e mandatario ta kere y esey ta su maneho, cu na final di dia Pais Aruba tin su propio responsabilidad pa reforza e seguridad di nos fronteranan y pesey apenas el a drenta den gobernacion a cuminza cu e proceso di “Request for proposals” na unda, a base di consehonan, lo haci un escogencia pa e ekiponan sofistica aki, cu mientras tanto a yega Aruba, y den e proximo siman e fabricante lo bin for di Noruega pa instala y check e equiponan, y duna instruccion na e expertonan di KPA pa nan por opera e ekiponan aki.
