Home Gobierno Minister Dangui Oduber hopi satisfecho cu resultado sumamente positivo di turismo

Minister Dangui Oduber hopi satisfecho cu resultado sumamente positivo di turismo

18
0
SHARE
- Advertisement -

Tanto pa Augustus 2018 y Augustus 2019:

ORANJESTAD (AAN) — Minister di Turismo, sr. Dangui Oduber a elabora den conferencia di prensa di gobierno Dialuna, tocante e resultadonan di e Industria Hotelero durante e luna di Augustus ultimo.

E resultadonan ta sumamente positivo; e dignatario a pasa un rato riba aña 2018, cu el a subraya “tabata un di e mihor añanan cu e industria di turismo di nos pais a conoce y tur indicador ta demostra esaki”.

E mandatario a menciona cu e cantidad di bishitantenan di repeticion y di turistanan di crusero ta mustra esey, y Aruba ta entre e cuater paisnan den Caribe cu un RevPAR mas halto; un grado di ocupacion di 87%, e cantidad di placa cu e turistanan ta laga atras a aumenta cu casi 9% y esaki ta indica cu e maneho di turismo ta dunando resultado y cu e turistanan afluente ta biniendo na nos pais.

E dignatario a sigui splica cu ATA semper ta target e turista cu tin un entrada anual di mas di 100 mil dollar. MEP a bisa, for di tempo di oposicion, cu nan kier atrae e turistanan di calidad pa Aruba y for di momento cu nan a drenta gobierno nan a cambia e “target group” y a enfoca riba e turistanan cu tin un entrada mas halto cu 150 mil dollar pa aña.

E dignatario a subraya cu e cifranan di 2018 ta mustra cu e entrada di turismo a crece cu casi 400 miyon florin extra, kiermen e cantidad di placa cu e turistanan ta laga atras den nos economia tabata casi 400 miyon extra na 2018, y pa 2019 no ta diferente.

Pa Augustus 2019 e grado di ocupacion compara cu Augustus 2018 a aumenta cu 5.2%, cu ta nifica 87%. Kiermen cu di cada 100 camber cu tin na Aruba 87 tabata ocupa, durante e luna di Augustus.

E “average daily rate” (tarifa promedio diario) a subi cu 5% y e ta na 238 dollar, y e RevPAR (Revenue Per Available Room) cu ta un di e indicadornan mas importante pa midi ki tipo di turista ta bin nos pais, a conoce un aumento di 12% den e luna di Augustus en comparacion cu e mesun periodo na 2018.

E RevPAR na e momentonan aki ta na 207.18 dollar, y esaki ta mustra kico e capacidad di gasto di un turista ta. Si un turista ta dispuesto pa paga 207 dollar pa anochi den luna di Augustus, cu no ta temporada halto, ta indica caba ki clase di turistanan ta bishitando nos pais.

Minister Dangui Oduber a expresa cu e ta sumamente contento cu e resultadonan aki. Tur indicador ta positivo y turismo ta keda e motor principal di nos economia, y cu tur e proyectonan cu su colega Otmar Oduber a repasa den su conferencia di prensa, siman pasa, ta muestra di tur e confianza cu ta wordo duna na te gobierno aki, for di e inversionistanan pa inverti den Aruba.

E dignatario a señala cu pa ocho aña largo no tabata tin confianza, no tabata tin ningun proyecto ni inversion.

“E unico inversion tabata di e Gabinete Eman cu no solamente a crea debe sino cu a endeuda no pais y mande bancarota. Sector priva no tabata kere den e gobierno anterior, si no e lo a haci e inversionnan necesario”, e mandatario a subraya.

Contrario na Gabinete Eman I y II, Minister di Turismo a sigui bisa, sector priva awo ta invirtiendo den e producto Aruba. Gobierno di su banda tambe ta haci di su parti. Den e cuadro aki a anuncia e proyecto di “boardwalk” na Malmok. E fase 1 ta yegando su fin e aña aki, y fase II lo sigui. E meta ta pa crea un area pa haci ehercicio pa uso di nos hendenan mes y di turistanan. Minister Oduber a subraya cu e ta un boardwalk sumamente bunita.

Tambe el a anuncia e proyecto di Baby Beach cu dentro di poco lo tin e groundbreaking y esaki lo complementa e proyecto di hotel, cu tambe lo tin e groundbreaking pa fin di e aña aki.

tereno di ex-Bushiri hotel lo wordo converti den un beach publico. A area aki lo wordo embeyece, lo pone landscaping, stacionamento di auto, lo drecha e beach, lo bin cu restaurantnan eynan. Lo traha un proyecto di calidad.

- Advertisement -

DUNA COMENTARIO

Please enter your comment!
Please enter your name here