Home Gobierno Minister Otmar Oduber a acentua cu Aruba tin un tremendo Prome Minister

Minister Otmar Oduber a acentua cu Aruba tin un tremendo Prome Minister

147
0
SHARE
- Advertisement -

Un dama cu el a siña conoce y respeta:

ORANJESTAD (AAN) – Finalizando su relato tocante su retiro na December venidero, Minister Oduber a recorda un rato con Partido Pueblo Orguyoso y Respeta (POR), lidera pa su persona hunto cu Andin Bikker, a nace y ta keda marca den historia.

“Andin, Marisol, Alan y tur otro cu a forma parti mi kier asegura nan cu Otmar ta keda miembro activo di POR y ta keda sostene mi partido, pasobra el a nace den un momento historico, y a percura cu un gobierno cu tabata tey pero no a zorg mas pa e bienestar di e pais aki, por a yega na un cambio”, e dignatario a expresa.

E mandatario a señala cu nan a forma un gobierno pasobra e boluntad di pueblo tabata un escogencia den un eleccion, di duna un rechazo grandi na e gobierno anterior, cu a pone tres partido sinta hunto cu otro no pa naturaleza.

“Tres Partido cu nos mester a sinta cu mester a combersa hopi cu otro, pero cu awe y mi ta dirigi mi mes specificamente na Minister Presidente Evelyn.

“Evelyn, mi ta kere cu no solamente nos a siña conoce otro pero respeta otro, y awe mi ta bay cu un curazon cu mi ta bisa cu nos tin un minister presidente cu tin e curazon ey caminda pueblo kier pa e tine. No ta facil, no ta un gobierno facil; e situacion di nos pais ta uno dificil, duro, pero manera un bon tata y un bon mama ta haci cu su yiu, e lo sundre, strafe, tin biaha antes nos tabata haya un klap tambe si ta necesario, pero nunca pasobra nos no ta stima e yiu. Nunca pasobra nos kier hacie dolor, pero pasobra nos kier pa e yiu ey tin un mihor futuro; ta un mihor hende, un mihor ser humano.

“ E gobierno aki tin decisionnan tambe fuerte pa tuma y a tuma nan, pero nos a tume cu mesun curazon ey di bisa cu nos kier wak e pais aki cu un futuro fuerte y un miho bienestar pa tur su hendenan cu ta biba den dje”, Minister Otmar Oduber a subraya.

El a agrega cu pa e motibo aki e ta keda sostene e gobierno aki y cada un di su coleganan y ta sostene e coalicion aki pa sigui goberna hopi aña mas, y ta pidi e comprension di comunidad pa duna e sosten y espacio pa sigui drecha loke a wordo encontra y hacie solido pa futuro.

“ Mi no ta bay ainda. Nos tin tres luna di trabao duro y mas duro ainda cu loke nos a traha e ultimo dos añanan pero mi ta convenci cu e pais aki ta keda den bon man, un bon Minister Presidente, un bon ser humano cu mi a siña conoce; cu mi a critica hopi den pasado, pero mi a siña tambe respete y mi ta convenci cu Aruba tin na e momentonan aki, un tremendo Minister Presidente y un tremendo gabinete”.

Pa finaliza Minister Otmar Oduber a gradici tur su coleganan y aunke ainda ta keda  hopi Conseho di Minister pa nan sinta, e mandatario a haya corecto pa comparti cu comunidad di Aruba su decision, tempran pa mañan no bisa cu tin problema di gobierno y cu e minister ta pidi retiro di un luna pa otro of cu tin problema cu un hotel pa San Nicolas of cu Serlimar, pasobra absolutamente esey no ta e caso.

Mas ainda el a lanza un invitacion for di awo pa e inauguracion di e hotel na San Nicolas na November proximo. Di antemano tambe el a gradici prensa pa su presencia den tur e conferencianan di prensa cu e ta tene.

- Advertisement -

DUNA COMENTARIO

Please enter your comment!
Please enter your name here