Home Gobierno Minister Otmar Oduber a confirma su retiro como gobernante y di bida...

Minister Otmar Oduber a confirma su retiro como gobernante y di bida politico

177
0
SHARE
- Advertisement -

For di entrante 12 di December 2019

ORANJESTAD (AAN) – Den conferencia di prensa di caracter extraordinario, Minister Otmar Oduber, Titular di Infrastructura, Medio Ambiente y Desaroyo Teritorial, a anuncia su retiro como gobernante y di e bida politico di Aruba, for di entrante 12 di December 2019.

E dignatario a wordo acompaña pa Gabinete Wever-Croes en pleno, lidera pa mr. Evelyn Wever- Croes, ken tambe a hiba palabra. Parlamentarionan di POR tambe tabata presente, y henter su ekipo di trabao.

Minister Otmar Oduber a cuminza pa menciona cu el a tuma nota di hopi informacion cu a cuminza circula, y mas adelante el a indica e motivonan cu a conduci e na e decision aki.

E mandatario a splica cu despues di basta combersacion cu a tuma lugar den fin di siman, y Dialuna henter dia, entre otro cu Minister Presidente (pa varios siman y hasta lunanan), Diamars den Conseho di Minister, na un forma oficial, el a splica nan cu el a tuma un decision estrictamente personal, cu tin di haber cu un combinacion di factor cu tin di haber cu su bida personal.

“Mi a tuma e decision cu lo mi termina mi carera politico, den e caso aki na December venidero, como tambe mi posicion como minister lo wordo entrega pa por continua cu e trabao cu ta wordo haci, di parti di e Gabinete, na e momentonan aki”, Minister Otmar Oduber a señala.

Pa e mandatario e no tabata un decision facil;  e mester a evalua esaki masha hopi mes, pero na cierto momento den bida, un persona ta haya notificacionnan pa e por bay den su mes (auto analisis) y esey e mandatario a haci.

“Mi a mira, naturalmente, despues di 22 aña, cu na December venidero mi ta cumpli den un politica activo y 18 di nan mi tabata den un carera manera nan conoce Otmar semper, ocho den Parlamento, un parlamentario fuerte y despues di esey siete aña como minister. E speed no a baha den e siete añanan ey, contrario mi a desplega hopi trabao y despues di esey, practicamente den un aña prepara un partido cu, te dia di awe, mi tin asina hopi honor di por a comparti cu tur mi coleganan, pa despues dos aña den un gobierno, loke no tabata facil”, Minister Otmar Oduber a expresa.

El a subraya cu danki na e coyuntura cu e gobierno aki tin y su amor pa nos pais, nan a haci trabaonan grandi.

Oduber a señala cu ta 18 aña consecutivo den su 22 añanan como politico, pero 25 aña den total for di aña 1994 cu e tabata rond den gobernacionnan pa traha pa Aruba.

“Mi ta durf pa bisa di mi mes, un tiki aworaki, cu mi ta kere cu e contribucion tabata hopi grandi y mi a hacie cu un amor enorme pa e pais aki. Mi a inculca e amor grandi aki den tur hende cu ta traha rond di mi y den mi famia. Mi a sali for di un famia cu no necesariamente tabata politico, mi no tabata tin ningun padrino den politica pa mi bisa ‘mi ta tuma votonan over’.  Mi a campaña y crece poco, poco y logra, ehecuta y haci un trabao pa un pueblo, pa un comunidad…” Minister Otmar Oduber a señala.

E mandatario a comenta cu e ta retira dia 12 di December 2019, pasobra netamente den un eleccion cu a tuma lugar un 12 di December, 22 aña pasa, su persona y su awendia coleganan Andin Bikker y Marisol Lopez-Tromp a participa pa prome biaha den eleccion tambe, aunke riba lista di diferente partido.

E dignatario a, practicamente confirma, cu su sucesor lo ta drs. Marisol Lopez-Tromp, cu a eherce e ministerio aki den pasado, e tin e conocemento y experiencia y a haci un hopi bon trabao, ademas e mes a introduci e ley R.O.P.

- Advertisement -

DUNA COMENTARIO

Please enter your comment!
Please enter your name here