Den presupuesto anualmente
ORANJESTAD (AAN): Minister Otmar Oduber ta indica cu como Mandatario encarga cu Infrastructura, el a keda sumamente contento den Parlamento, “na momento cu nos tabata atende y duna cuenta na Parlamento pa cu e trabounan cu a realisa durante e prome 6 lunanan, ora cu un mocion a wordo presenta den Parlamento pa instala bek e fondo di Caretera “Wegen en Infrastructuurfonds” (WIFI). Ta di gran importancia cu pueblo di Aruba ta reconoce tur e trabaonan cu a wordo haci desde cu Gabinete Wever Croes a sinta como Gobierno.
Drechamento di caminda of pone asfalt riba nos isla, no ta un luho mas, pero e ta di suma importancia pa asina nos sigui eleva e calidad di bida di nos sernan humano. E ta un alivio ora cu un habitante no ta haya molester di stof mas of ta bira malo pa e simple hecho cu dilanti nan cas of bario ta completamente bou di stof.
Un otro parti importante cu ta inclui den e fondo di caretera, ta na unda cu Gobierno por sigui construi mas verkeersplateau dilanti varios scol, camindanan principal of lugarnan di suma importancia pa preveni incidentenan cu por pasa. Como mandatario mi mester bisa cu e fondo di caretera ta hopi importante. A menciona algun di e trabaonan cu ta wordo realisa den e fondo di caretera, pero tin mucho mas.
Ta di gradici cu e varios fraccion ta mira cu e fondo di caretera ta importante, y cu esaki mester ta hinca den e presupuesto di Gobierno anualmente pa den e forma aki sigui drecha varios caminda rond di nos isla, pa asina keda eleva nos calidad di bida di nos hendenan.
