Ainda falta 17 tereno mas pa adkiri:
ORANJESTAD (AAN) – Minister di Infrastructura, Maneho di Medio Ambiente, y Desaroyo Teritorial, a habri e conferencia di prensa di dialuna cu tres tema riba agenda, cuminzando cu adkisicion di un tereno priva door di Parke Nacional Aruba.
Su prome tema tabata e “Fundacion Parke Nacional Aruba” cu despues di atende cu basta tereno cu tabata cay bao doñonan priva, y no directamente den maneho di e parke, Diabierna e prome tereno a keda adkiri pa e fundacion.
Esaki ta un tereno na Boca Prins, despues di a negocia pa añanan largo cu e doño. Diabierna e tereno a wordo traspasa pa PNA, y manera a cumpra e tereno a pasa esaki pa e parke y a cambia statutonan pa Pais Aruba, a pone den e mesun Acta, y gobierno na su turno ta entrega esaki bek pa por wordo opera y maneha door di Parke Aruba (antes Parke Nacional Arikok).
E dignatario a subraya cu siman pasa, pa prome biaha den historia a firma un acuerdo cu e directiva y conseho di supervision di PA pa di e forma aki por maneha y haci e tarea cu nan tin den e statutonan pa opera e teranan aki pa nos pais.
Manera ta conoci, e Parke aki no solamente a cambia su nomber pa Parke Aruba, den e ultimo statuto, y di e forma aki por atende cu, entre otro, Spaans Lagoen.
E mandatario a señala cu ya caba nan ta bezig cu e Parke Marino, y proximamente lo ricibi e Landsbesluit-HAM pa loke ta trata e 16 areanan proteha, a base di e cambionan den e statuto awor e parke lo keda encarga cu su maneho tambe, cu a haci cu mester tabata tin un “beheersovereenkomst” unda por a defini na un manera hopi cla, kico ta e trabaonan cu nan ta haci y, naturalmente, como doñonan di e tereno aki kico por verwacht di e parke.
Minister a expresa palabra di felicitacion pa e directie y e hunta di supervision di e Fundacion Parke Aruba.
E dignatario a duna un splicacion di e proceso ora Parke ta adkiri terenonan, nan mester bin pa Pais Aruba cual na su turno ta retorna nan den beheer na e Parke y aki ta caminda cu el a duna reconocimento na e directiva anterior cu a cuminza cu e proceso aki.
El a subraya cu fondonan a wordo adkiri door di e subsidio cu e parke tabata ricibi di gobierno y otro fondonan cu e parke mes a genera, door di otro entradanan.
Tin un average di 17 tereno mas cu e Parke mester adkiri, pa e ora ey tin un maneho structural riba e area aki, cu den ley ta wordo proteha como e area di Parke Nacional Arikok.
E dignatario a yama expresa un pabien grandi na comunidad indicando cu esaki ta un momento historico pasobra e ta mustra cu gobierno ta insisti unda mester proteha nos flora, fauna, y henter nos naturaleza.
