Home Gobierno Ministro Dangui Oduber evaluando pa stop tur pago na SOGA y Contratista

Ministro Dangui Oduber evaluando pa stop tur pago na SOGA y Contratista

354
0
SHARE
- Advertisement -

Loke a pasa na Hospital…

ORANJESTAD (AAN): Ministro Dangui Oduber riba Diabierna mes a dirigi un carta hopi fuerte mes contra SOGA y tambe e Contratista cu a keda encarga cu renobacion y construccion di edificionan nobo na Hospital.

Gobierno a mustra cu nan ta evaluando pa stop tur pago na SOGA y e contratista OHL/Arellano, despues cu henter pueblo por a mira e desastre cu ta pasando despues di e yobida di un simple Ola Tropical riba Diabierna madruga.

E carta a wordo firma pa Ministro Dangui Oduber mes, y ta dirigi na e Fundacion di Stichting Onroerend Goed Aruba (SOGA) cu ta encarga cu e proyecto.  Den linea grandi, e titular di Salubridad Publico ta mustra cu nan ta evaluando pa stop cu tur pago y combina esaki cu posible medida legal contra e Fundacion.

Tur esaki pa motibo di e fayonan cu ultimo lunanan ta constantemente den noticia, den boca di tur empleado, y tambe den bista di publico.  Problema cu leakmento di diesel, problema cu holor ta plama paden, problema cu bentananan no por habri, y esun peor tabata inundacion den Servicio di Emergencia di Hospital, despues di un simple yobida di Ola Tropical di algun ora.

Un proyecto cu originalmente a wordo calcula na 200 miyon Florin, na final a bin ta costa pueblo pagador di belasting riba di 900 miyon Florin.

Manera e sistema legal ta poni aworaki, SOGA ta doño di e compleho di Hospital, y pais Aruba ta bay huur e compleho aki for di SOGA.  Stichting Ziekenverpleging Aruba (SZV) lo bay tuma esaki den uso.

Den e carta, Ministro Oduber a splica cu no ta necesario pa mustra mes cu e trabao di construccion y renobacion no a bay suave y e ehemplonan di casonan cu a socede ta demasiado pa skirbi den e carta.  Sinembargo e incidentenan a trece consecuencianan importante pa empleadonan di Hospital, pacientnan, y salud publico en general.  Riba Diahuebs a hasta convoca un reunion di emergencia riba peticion di Mediador di Gobierno relaciona cu e kehonan di Sindicato AVB di enfermeronan relaciona cu molester cu nan ta topa cune cu e trabao di construccion.  E partidonan envolvi a trankiliza un poco despues di e reunion aki.

Sinembargo Diabierna madruga, un parti di e edificio nobo a inunda despues di awacero posiblemente debi na un leak cu probablemente a bin debi na e calidad di e trabao haci den construccion.

E awa cu a basha paden a causa daño na materialnan di SZA, y tambe por tabatin un impacto negativo den atencion medico.  Claro cu por compronde cu awor si hemchi a yena pa tur esnan envolvi, y pesey tin di bay haci cambionan drastico riba corto plazo pa evita incidentenan.

E bienestar di e empleadonan, bishitantenan y sigur di e pacientnan ta di sumo importancia.

Ora cu e proyecto aki keda cla, pais Aruba lo bay tin di paga hopi pa varios decada pa un proyecto unda e trabao entrega por wordo cuestiona.  Basa riba loke a bin ta pasando, awor Gobierno ta evaluando pa stop of suspende e pagonan aki, y tuma medidanan legal pa sigura su inversion y den interes di atencion medico.

Ministro a mustra, cu e ta spera cu SOGA lo sa di tuma medidanan urgentemente riba e contratista OHL/Arellano, y Gobierno ta spera di por haya contesta pronto bek.

 

- Advertisement -

DUNA COMENTARIO

Please enter your comment!
Please enter your name here