Home General Mr. Evelyn Wever-Croes ta un lider!

Mr. Evelyn Wever-Croes ta un lider!

373
0
SHARE
- Advertisement -

Analisis

22 september 2017   –   21 september 2019

Na inicio di e siman aki, nos a trece dilanti cu e siman di Prome Ministro Wever-Croes a yega. Pakico nos a haci e expresion aki dianan prome cu Aruba a wordo realmente sorprendi pa e forma cu rutina politico a wordo kibra?

Como matutino di Aruba, DIARIO mester mira no solamente loke politiconan y hasta publico kier pa nos mira. Nos mester vigila constantemente kico ta pasa y kico por pasa a base di cada paso di personanan cu tin destino di Aruba den nan man.

Cu Aruba tabata enfrenta un momento importante no tabata solamente bisto den informacionnan cu nos tabata tin como medio di comunicacion cu ta haci su trabou di analisa y investiga cu ta base di periodismo cu no por depende di loke politiconan kier scucha.

Na momento cu vacacion di school a termina, nos a avisa Aruba cu por spera turbulencia. Nos tabata na haltura di loke a wordo prepara pa tapa fayonan enorme cu gabinete Wever-Croes a hereda. Uno di nan sigur ta e asunto di e sindicato di Duaneronan, cu tabata tin un areglo for di 2017 cu gobierno anterior di Mike Eman.

Aruba a bira manera un neishi di fruminga  mientras e fecha 20 di September tabata yega. Den e epoca aki DIARIO a percura duna pueblo tur informacion pa asina evita cu manipulacion politico cu a destrui bienestar di Aruba te 2017, por a crea opinion publico robes.

E siman aki, Prome Ministro Wever-Croes mester a bay bisa Reino kico Aruba ta haci cu su futuro. Manera DIARIO a indica, areglonan di Statuut mescos cu Constitucion ta exigi bienestar di e hende.

E fin di siman aki tabata dobel mas importante pasobra tabata bisto cu den cierto seno, campaña politico pa e proximo eleccion a cuminsa y cu lo a uza e miseria cu nan mes a crea, pa haya pueblo di nan banda.

E fin di siman aki Aruba ta recorda cu dia 22 di september 2017 el a bay urna electoral y a kita e poder mayoritario for di Gabinete Eman.

A base di e resultado di eleccion, mr. Evelyn Wever-Croes a bira Ministro Presidente di Aruba den un tempo di crisis. Durante e siman cu a termina Ministro Presidente Wever-Croes a dicidi cu e ta carga responsabilidad pa e pais.

Sin show, sin manipulacion politico, el a informa Hulanda con lo busca solucion pa Aruba hunto cu Hulanda. E no a ratifica cambionan riba cual Parlamento a dicidi, pero a dicidi pa a base di e asistencia, supervision Hulandes, Aruba por yega na un solucion pa su problemanan.

Cu e acto aki Ministro Presidente Wever-Croes a duna prueba cu e ta un lider. El a responsabilisa su mes pa su accion den Parlamento y no riba baricada ni den show publico.

Asina awe Aruba ta drenta e di dos parti di e periodo entre eleccionnan cu un rumbo determina pa solucion.

Hunto cu Hulanda lo dicidi con ta rescata financia di Aruba pero tambe economia y bida social di e pais.

Di e forma aki como lider di e pais, Ministro Presidente Wever-Croes a actua segun ley pero na defensa di bienestar di Aruba segun su consenshi. El a demostra di ta tuma e  riesgo cu Parlamento lo no acepta su punto di bista cu tur resultado cu esaki lo tin politicamente.

El a dicidi pa responsabilidad, pa liderazgo cu ta basa riba firmesa di lider!

- Advertisement -

DUNA COMENTARIO

Please enter your comment!
Please enter your name here