Comentario:
Pa Mercedes Monge
Añanan 70 a distingui pa e cantidad di cantante hoben cu a surgi, no solamente den e mundo di musica rock, pero tambe den e musica romantico, pasobra e generacion di e tempo ey tabata hopi romantico.
Mi a forma parti di e hubentud di dicho epoca, y mi tabata un di su tantisimo fans di Camilo Sesto, cual nomber original tabata Camilo Blanes Cortés.
Cada senciyo y long play cu tabata bin na e mercado, ata mi tabata core cumpre pasobra mi tabata encanta cu su cancionnan. No ta por nada nan tabata yame “e cantante di e amor”.
Ken cu a forma parti di e decada 70 por a lubida cancionnan manera “Perdoname”, “Jamas”, Fresa Salvaje”, “Con el viento a tu favor”, “donde estes con quien estes”? Pa recorda algun di su amplio repertorio.
Tambe el a yega di protagoniza hunto cu Angela Carrasco un film cu a causa polemica: “Jesucristo Super Estrella”, si mi no ta hera tabata na 1976.
Tocante su salud e ultimo añanan tabata tin hopi version, y un sumamente comenta tabata un problema renal, di cual segun a wordo difundi a causa su morto Diadomingo madruga, despues cu Diasabra anochi el a wordo interna den un hospital na Madrid.
E tabata un hoben cu un rostro sumamente nechi, y causo hopi polemica y hasta burlanan ora el a opera su cara pa “elimina” su aruguitanan cu den nada tabata hacie mahos, y el a bira victima di un mal practica y a biba e resto di su bida casi desfigura, pero a sigui lucha den e mercado di espectaculo, te casi su delaster dianan.
Camino Sesto a sembra hopi sentimento bunita den e curazon di e hubentud di e epoca 70. A pone nos curazon palpita di amor y tambe nos wowonan yora di dolor y desilusion segun e momento cu como hoben, nos tabata pasando.
Mi ta corda tempo cu un grupo di colega di Hospital de Niños na Costa Rica, tabata sali bay balia Diabiernanan anochi, e musica di Camilo Sesto no por a falta, sea den un salon of den e cas di un colega unda nos tabata organiza fiesta.
El a bira hopi famoso, pero a pasa den momentonan hopi duro. Ups & Downs hopi dificil. Pero semper a wordo stima den su pais, na otro paisnan di Europa, y sin duda alguno den America Latina. E tabata un idolo! Dios tine na su Gloria, descansa den paz di Señor Camilo Sesto.
