Minister Otmar Oduber a enfatiza:
ORANJESTAD (AAN)—Minister Otmar Oduber, durante e conferencia di prensa teni na Punta Cana, den e contexto di e proyecto di hotel pa San Nicolas, specificamente na Seroe Colorado, di e marca Secret, a haci algun aclaracion relaciona cu cierto impresion incorecto cu tin den pueblo.
E dignatario a splica cu ta trata di un extension di tereno di mas of menos 100 mil meter cuadra, pasobra den ROP a wordo bisa cu maximo cu por wordo construi den e area aki ta tres piso.
E marca Secret ta distingui pa tres of cuater piso maximo, y e ora ey mester bay den hancho. No ta un concepto di hotel cu ta placha riba otro, pero tin hopi espacio y naturaleza cu ta permiti cu e medio ambiente ta wordo respira.
Tocante e cuevanan cu tin tanto hende preocupa cu si nan lo wordo elimina, e dignatario recientemente a bishita nan tur, y el a remarca cu no tin un cueva di fosfat den e area aki. E cueva di fosfat ta hopi leu for di e tereno destina pa e proyecto aki.
E cueva mas grandi di Caribe, cu tambe ta ubica bao di e casnan di Seroe Colorado, cu ta un beyeza tambe, ta fuera di e tereno. E unico tunel ta esun cu a wordo traha na man tempo di Lago, y cu despues a expande ta esun cu ta core bao di e tereno concerni, pero door cu ta bay te maximo 3 piso y cu no tin e presion riba e subsuelo, e garantia tey cu e ta wordo proteha cu ta un condicion fuerte cu gobierno a pone, y definitivamente e acceso ta wordo poni liber, publicamente, pa e ciudadano local na prome lugar bishita e lugar aki y tambe nos bishitantenan, pasobra e ta un atractivo den area aki.
