Home Gobierno No tin nada ariba e mundo aki cu por scapa Aruba di...

No tin nada ariba e mundo aki cu por scapa Aruba di e debe cu tin, na un manera facil

1408
0
SHARE
- Advertisement -

Minister Presidente mr. Evelyn Wever-Croes:

ORANJESTAD (AAN) – “Pa e situacion financiero di nos pais, cu a wordo causa na un forma iresponsable, no tin nada riba e mundo aki, cu por scapa e debe aki, na un manera facil. No tin ni un medida, ni un solucion pa e problema financiero causa pa e gobierno anterior facilmente”, Minister Presidente a expresa den conferencia di prensa di Gobierno, Diahuebs mainta.

Minister Presidente, mr. Evelyn Wever-Croes, a señala cu esaki ta nada nobo pa comunidad, y no tin ni un partido politico na Aruba cu por soluciona e situacion financiero dificil aki na un otro manera cu esun cu gobierno ta siguiendo.

Ni Partido AVP, ni RAIZ, ni POR ni RED ni otro partidonan nobo nan so, no por soluciona e problema aki den un rato di ora of den un frega di wowo, cu haci e dolor cu e ta haciendo, pasobra no tin otro manera cu e forma cu gobierno ta atende cune.

Minister Presidente a reitera cu e problema financiero di Aruba no ta wordo soluciona cu medida, ni impuestonan cu ta subi so, pero tin cu solucione cu desaroyo economico, atrayendo inversionistanan di exterior, creando cuponan di empleo y brindando nos mes hendenan espacio y oportunidad pa desaroya nan negoshi.

Busca un balanse entre e dos aspectonan aki, ta e reto di mas grandi cu gobierno tin su dilanti, segun Minister Presidente.

El a subraya cu hopi facil pa cera e gap financiero hisando belasting aki aya, pero gobierno no ta bay hacie. E ta tumando su tempo pa yega na e balans corecto di e desaroyo economico, e pilarnan cu por trece cu seguridad e entrada cu mester genera, pa asina cera e gap financiero. Gobierno ta den e proceso ey ainda.

Pa duna un ehemplo figurative so, e mandatario a bisa ban sali for di e punto di bista cu e gasto y entradanan di gobierno ta keda igual. Nada ta baha (entrada), nada ta subi (gasto) e aña aki y e aña siguiente.  Ningun hende ta bin acerca den gobierno y ningun hende ta bay. Ningun hende ta haya promocion ni periodic, ni un inflacion ta bay paga extra pe.

E mandatario a reitera cu e aña aki tin un deficit di 25 miyon y pa otro aña lo mester ta un surplus di 25 miyon.  Kiermen gobierno tin un gap di 50 miyon caba pa cumpli cu e normanan financiero. Ta bin acerca cu otro aña mester paga un suma adicional pa proyectonan PPP, ocasiona pa e gobierno anterior. Prome Minister a corda cu na aña 2013, den su format opdracht a duna minister presidente e tempo ey sr. Mike Eman, instruccion pa no cera mas na proyectonan PPP,  pero el a hacie toch.

Pero e pueblo tin cu paga esey “cu orguyo” y e otro aña 20 miyon adicional “cu orguyo”. Pues e gap di 50 miyon ta bira 70 miyon door di e PPP, mas 20 miyon di Citgo cu ta bin acerca, y ta bira 90 miyon. Fuera di esey e gastonan di AZV cu ta gigantescamente halto, bayendo pa 20 miyon e aña cu ta bin, algo cu gobierno no a tene cuenta cune cu ta haci un gap di 110 miyon florin. Gobierno no ta cla ainda pero e ta buscando e balans cu pueblo por wanta y biba cune, y cu lo trece e desaroyo economico cu mester den nos comunidad.

 

 

- Advertisement -

DUNA COMENTARIO

Please enter your comment!
Please enter your name here