ORANJESTAD (AAN): Un Invitacion cordial na tur nos Parokianonan , Scolnan, Gobernantenan, Miembronan di Plan Pastoral 2018-2021 y Aruba en General, pa bin celebra hunto cu nan.
Esaki lo ta e Fiesta di nan Patrono y 100 aña di consagracion di Misa. E lo ta Diabierna 4 di October pa 7:00 pm.
Fiesta Solem di San Francisco lo worde celebra pa Monseignuer Luis Antonio Secco y concelebra pa superior di Congregacion San Miguel Arcangel, nos Pastoornan di Aruba y invitadonan di exterior.
Lo bay tin un procesion cu lo sali 6:15 pm for di Hofi di Mama Maria. Esaki ta bay acompaña pa un orkesta.
Biografia di San Francisco:
Francisco, a nace na Assisi, Italia na aña 1181, y tabata yiu di Pietro Bernardone y Pica. E tabata yuda su tata den negoshi y tabata envolvi den bida social di e famianan rico di e sociedad.
Durante di tabata rehen den un guera entre Assisi y Perugia, Francisco a sinta examena su bida. Di eynan el a cuminsa biba un bida cu intenso oracion y repartiendo su bienesnan cu pobernan.
Conmovi pa un encuentro cu un leproso, Francisco a cuminsa traha meymey di leprosonan y otro marginadonan di sociedad. Su tata no tabata di acuerdo cu su manera di biba. Pero Francisco a prefera di sigui, maske su tata a desherede. Na aña 1208 el a cuminsa predica publicamente, y pronto el a atrae hopi siguidornan.
San Franciso a muri riba 4 oktober 1226 y a worde canoniza dos aña despues pa Papa Gregorio IX. Su carisma, compasion y amor pa creaccion di Dios, a hacie un di e figuranan mas popular di cristianismo. Francisco a biaha pa Roma unda el a haya aprobacion di Papa pa su ordo, pa despues bolbe na Assisi. Na aña 1217 el a manda e prome misioneronan pa exterior y e mes a yega te Egipto.
Bek na Assisi e tabata leader di por lo menos 3000 miembro di su ordo. Durante di un retret na aña 1224, el a haya un vision y djei a sali cu heridanan di Cristo, stigmata, visibel riba su curpa.
