Den nan prome edicion den un localidad diferente
ORANJESTAD (AAN): Organizadornan di e Caribbean Sea Jazz Festival a anuncia den un rueda di prensa diahuebs atardi cu e aña aki nan lo tene un gran festival dianan 20 y 21 di September na Casibari Music Cafe and Grill y cu lo carga e nomber di Casibari Jazz Festival Aruba.
Esaki lo bira e prome Casibari Jazz Festival y durante esaki mas di 60 artista, local y internacional lo ta uni pa asina aki nan comparti nan arte cu e bishitantenan, Mark Benson a duna di conoce.
Mayoria di e artistanan lo ta musiconan pero tambe lo tin artesanonan cu lo expone nan obranan durante e dianan aki. Tambe lo por disfruta di arte culinario cu un tremendo ‘food court’.
Fundador di e festival Erik Eman, a expresa di su banda cu e motibo cu nan no a sigui manera normal ta pasobra nan main sponsor a cay afo y a dicidi pa toch sigui cu e evento.
A pensa cu ta hopi importante pa continua cu e festival pa asina sigui fomenta e bon musica y arte na e isla.
Asina a dicidi di haci e festival na Casibari Cafe y cu e sosten di hopi di nan sponsornan, pa locual e ta hopi agradecido. E aña aki UNOCA ta e sponsor principal.
Pa loke ta e lineup di e aña aki, a bisa cu esaki lo presenta ariba dos stage. Diabierna lo tin presentacion di Tony Succar cu lo toca hunto cui Robert Jeand’or. Tin tambe Ara Caribbean Jazz Sextet ( di Jeremy Bonarriba) y Michael Bremo Quintet.
Ariba diasabra lo tin ariba stage Oruba, Randall Corsen ft. Tania Kross & Dibo-D, Antonio Bello & Friends y Count Tutu.
Ray-Anne Hernandez ,directora di UNOCA, a splica cu nan ta sostene e event aki pasobra e tipo di musica cu ta wordo presenta durante e jazz fest no necesariamente ta main stream popular na Aruba pero tin un gran cantidad di musiconan local cu ta toca den hopi di e gruponan di jazz, di blues, y diferente otro tipo di musica cu no ta esunnan popular manera reggaeton, salsa, merengue cu ta wordo scucha normalmente ariba radio.
E festival aki ta un espacio unda e musiconan aki por presenta nan arte. E parti cu UNOCA a financia ta specialmente dirigi ariba e artistanan local, Hernandez a indica.
El a invita comunidad di Aruba pa duna un aporte y bishita e festival pa aprecia e musica y e talentonan cu lo presenta e dos dianan aki.
Jeremy Bonarriba, kende ta un musico cu no por falta den e festivalnan aki a expresa cu di ta contento y gradici cu e continuidad di e evento. Ta diesdos aña caba cu nan ta bezig cu e organizacion di e festival y cada aña nan ta sinta hunto pa haci ‘brainstorming’.
Hopi musico local y jong a sali for di e festival aki y esey ta algo bunita pa realiza, a bisa.
Mester enfatiza cu e prijs pa entrada ta uno basta accesibel. Pa studiantenan (cu ID) tin un prijs special.
Pa loke ta e parkeo, e organizacion a bin cu un idea hopi bon cual ta cu ta bay tin shuttles for di Misa di Paradera (y viceversa) for di 6 pm te 2 am. Lo por para auto den e area di Misa di Paradera y for di eynan lo hiba esnan interesa gratuitamente te na Casibari Cafe.
Tur concierto tin un ora aproxima pa cuminza cu ta entre 7 – 7:30 pm y lo caba pa 1 – 1:30 am. Portanan lo habri 6 pm.
