Logro di Gustave Nouel
ORANJESTAD (AAN): Durante e asina yama ‘Kunstcircuit open’, cu ta tuma lugar for di 9 te 14 di september, tur sorto di disciplina di Arte lo ser presenta na Deventer (Hulanda), cu lesnan di nivel halto y/o demostracion di musica, baile, teatro, arte y hopi mas. Den foyer lo tin un exposicion di algun docente/artista conosi relaciona cu Kunstcircuit.
Den foyer di ‘Kunstcircuit’, (un di e Centronan Cultural mas importante y grandi di region), e pintor Arubiano, Gustave Nouel, lo duna un demostracion/performance di pinta portret, diarazon 11 di September.
E mes anochi artista Chretien Goos di Groningen lo duna un demostracion/performance di pinta ‘bodegon/stilleven’. Hunto cu artista Hajo Snater y un grupo di colega artista vincula na Kunstcircuit, e mihor alumnonan di Gustave Nouel lo haci ‘street-sketches’ di publico presente.
Tambe un modelo presente lo por ser pinta libremente pa tur hende den un sala banda di foyer. E artistanan professional Gustave Nouel, Chretien Goos y Hayo Snater lo coach e publico interesa caminda ta necesario o desea. Pero tambe publico por djis mira y disfruta di keshi y biña (Frances) durante e anochi promocional aki den ambiente Frances… (a la Montmartre).
Na Kunstcircuit e curso nobo di Diamars anochi ‘street-sketching & painting’ pa tur nivel, di e artista conosi Gustave Nouel, lo cuminsa. E prome les lo ta un ‘proefles’ gratis di 7:15 pm te 9:15 pm, durante ‘Kunstcircuit open’, diamars 10 di September.
Na Deventer caminda Gustave Nouel ta biba, e ta gusta comparti su expertise cu su coleganan artista riba tur nivel y e ta mustra su Arte den tur sorto di exposicionnan. Tambe na Kunstcircuit mes algun di su pintura lo por ser mira den e foyer durante ‘Kunstcircuit open’…
E Arubiano professional Gustave Nouel ta duna performance, workshops y/o exposition, tanto nacionalmente como internacionalmente, hopi biaha como un artista specialmente invita.
Esnan cu Internet por mira mas na: http://bit.ly/gustave_arte
