ORANJESTAD (AAN): Informacion for di St. Maarten ta indica cu e Parlamentario Frans Richardson a wordo aresta Dialuna, riba sospecho di a haci maluso di poder, soborno, y falsificacion. Richardson ta lider di partido di oposicion USP.
Richardson a wordo deteni pa algun tempo caba aña pasa como parti di un investigacion na gran escala riba fraude y corupcion di e Waf na e isla, bao di e nomber di “Emerald Case”. E fraude den Waf ta trata principalmente pa soborno y fraude di impuesto.
Departamento di Impuesto a calcula cu e fraude ta encera un suma miyonario cu dealnan hopi dudoso. Tambe e lo a acepta un soborno y a participa tambe den cumpramento di voto. El a wordo aresta den su auto door di e Team Special Anti-Corupcion di St. Maarten, esta TBO.
Na comienzo di aña aki tambe, e lider di e Partido Democrat grandi den Gobierno, Theo Heyliger a wordo aresta relaciona cu un importante caso di fraude y corupcion den e sector di construccion riba e isla. E ta sospechoso tambe di a soborna un Parlamentario na 2013.
