Home Parlamento Presidente di Parlamento ta mustra con fuerte e presion di Gobierno di...

Presidente di Parlamento ta mustra con fuerte e presion di Gobierno di Reino riba Aruba!

440
0
SHARE
- Advertisement -

“Locual nan ta haci no ta husto!”

ORANJESTAD (AAN) – Durante un entrevista exclusivo cu Matutino DIARIO, mr. Ady Thijsen, Presidente di Staten, a sigui splica kico ta pasando cu e organo di supervision CAft; na unda e situacion ta pega, kico gobierno ta haciendo pa logra yega na un bon acuerdo pa ambos.

Presidente di Staten a reitera cu, apesar cu legitimamente, Parlamento di Aruba a cambia e ley di CAft, Gobierno di Reino semper tin e supervision a base di articulo 43, inciso 2, loke ta nifica cu nan semper ta keda cu autoridad; cu nan tine a base di statuut, pero toch nan no a haya esey bon.

Gobierno di Reino ta argumenta cu tin un protocol cu e gobierno actual a firma, dia 22 di November, y esey ta conta. Presidente di Parlamento mr. Thijsen a subraya cu esey no ta berdad, pasobra dos pais por cera protocol, pero un protocol entre nan dos. Pues un protocol no por schake uit (elimina) un Parlamento.

“Pasobra den un Democracia nos tin tres politica, y podernan separa. Gobierno di Hulanda, Gobierno di Aruba, y Parlamento. Kiermen dos gobierno no por bisa cu nan ta bay haci tal cos y Parlamento no por haci nada. E ora ey, nos tin un problema”, mr. Thijsen a señala.

El a expresa: “Ora Parlamento di Aruba a cambia e ley, Gobierno di Hulanda no a gusta esey. Y nan ta busca un manera awo y ta amenaza cu nan ta bin cu KB pasobra Aruba no ta cumpliendo, pero esey no ta berdad”.

“Si nos wak na 2017, November, cu e gobierno nobo a sinta, tur su pasonan y decisionnan cu a tuma, y si wak e presupuestonan nan ta bay bon. Hasta tin un surplus. Loke Parlamento a haci den tur e decisionnan cu nos a tuma, ta bin cu leynan pa fortifica e Estado di Derecho. Nos ta canando riba e bon caminda, pero ta nan ta bisa cu nos no ta cumpliendo cu e palabracion, loke no ta berdad”, mr. Thijsen a reitera.

“E berdad ta, y mi ta papia cu hecho, cu si e Gobierno di Reino lo a supervisa manera mester ta, esey ta su tarea y obligacion, Aruba lo no tabata den e problema grandi aki. Aruba lo a sali for di dje. Pasobra tres aña pasa e mester a bisa gobierno ‘bin cu crisis heffing’, ‘bo tin cu kita hende foi trabao’. Nan no a hacie! Nan a lague pasa!”, mr. Thijsen a señala. Indicando cu si nan a laga esaki pasa kiermen cu nan tambe a crea e problema.

“Nos mester ta sincero cu otro, abo ta bisa nos un cos pero abo no a cumpli tampoco. Awor nos tin cu yega na otro bek pa e bienestar di Aruba, pasobra e meta ta pa Aruba bay bek den e bon caminda, y nos ta canando e caminda bon, pero gobierno di Reino ta keda pone presion inhustamente, y ami ta bisa cu lo yega momento cu esaki por trece confrontacion”, Presidente di Staten a señala.

El a expresa cu Aruba no por laga gobierno di Reino trapa riba su constitucion, no por laga nan trapa riba e pueblo aki.

“Loke ta pasa awo ta cu nan kier laga pueblo di Aruba paga pa tur e dañonan cu gobieno anterior a haci y cu nan a laga pasa. E no ta husto. Hulanda kier pa nos gobierno tuma tur sorto di medida si ta pa nan, mescos cu Corsow. IMF mes a bisa cu nan ta hinca Corsow den mas problema. Si Aruba ta bayendo malo, pakico IMF ta bisa cu nos ta positivo, Standard & Poors ta bisa cu nos ta stabil, CAft mes a bisa poco dia ey cu Aruba ta bayendo bon… Nan tin cu ta sincero cu Aruba tambe. Nan no a cumpli tampoco. Kiermen nan tin cu duna nos e tempo y espacio pa nos drecha e situacion. Pero nan kier pa den un of dos aña nos haci tur cos, kiermen cu si pueblo mester paga pe, pueblo ta paga pe. Esey no  por, e no ta na su lugar”, mr. Thijsen a reitera.

Esaki, mr. Thijsen a subraya, ta e impasse cu tin. “Mi a busca tur sorto di manera pa dialoga y e  no ta bay pa mi ni pa ningun parlamentario individual, e ta bay pa Instituto di Parlamento. E Instituto Parlamento den un pais democratico, den un estado di derecho, tin su balor, pasobra e ta representa e pueblo aki. Parlamento no ta un departamento di gobierno, bo no por hunga cu Parlamento, bo mester respeta e Parlamento.

Si nos ta haci cosnan cu ta contra ley, y contra principio di bon gobernacion, ami ta compronde cu Hulanda por papia, pasobra Statuut ta stipula cu e ora ey e por entromete, pero si nos ta cana e caminda bon, haci loke e Constitucion y principio di bon gobernacion ta bisa nos, nan no por elimina nos manera cu Parlamento tin cu keda un banda”, mr. Thijsen a subraya y a pone cu esaki Parlamento di Aruba no ta acepta, pasobra e ta inhusto. Conseho di supervision mes a crea cu e debe a bira mas grandi y e interes mas halto tambe.

“Nan mester duna di nan banda awo, y duna nos e oportunidad. Yuda nos haya chens di fia placa na menos interes pa nos drecha nos presupuesto y nos problema financiero, cu nan mes a pone cu e situacion a bira asina malo. Nan no kier duna nos e cooperacion aki y esey ta e parti unda nos ta pega”, mr. Ady Thijsen, Presidente di Staten a expresa.

 

 

- Advertisement -

DUNA COMENTARIO

Please enter your comment!
Please enter your name here