Prijs promedio di electricidad pa vivienda a keda Afl. 265.65
ORANJESTAD (AAN): Segun Oficina di Estadistica, prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Juli 2019 e prijs promedio pa bari di petroleo (US$ 57.28) a conoce un subida di US$ 2.62 (4.8%) compara cu Juni 2019 (US$ 54.66).
E costo total di energia pa kWh pa un uso di electricidad te cu 500 kWh no a cambia na Juli 2019, el a keda Afl. 34.52 cent pa kWh. E costo total di energia pa kWh pa un uso di entre 501 – 1000 kWh no a cambia na Juli 2019, el a keda Afl. 35.72 cent pa kWh. Adicionalmente, e costo total di energia pa kWh pa un uso di electricidad riba 1000 kWh no a cambia na Juli 2019, el a keda Afl. 45.93 cent pa kWh.
Prijs di electricidad y di awa no a cambia compara cu Juni 2019. Consecuentemente, e prijs promedio di electricidad pa vivienda a keda Afl. 265.65, mientras cu e prijs promedio di awa pa vivienda a keda Afl. 137.05.
Prijs di gasolin baha na Juli 2019 cu Afl. 1.50 cent (-0.7%) y a causa un efecto di -0.03 ppt riba e CPI. Prijs di diesel a registra un caida di Afl. 9.50 cent (-5.2%) na Juli 2019 y a causa un efecto di -0.02 ppt riba e CPI.
Na Juli 2019, utilidad, gasolin y diesel como grupo, tabata tin un caida di prijs di 0.3% compara cu Juni 2019 y tabata tin un efecto di -0.05 ppt riba e CPI, mientras cu e restante 404 bienes y servicio hunto a experencia un subida di prijs di 0.1% y tabata tin un efecto di 0.11 ppt riba e CPI.
