ORANJESTAD (AAN): Procolombia ta un entidad di e gobierno colombiano cu ta promove e intercambio ariba diferente tereno cu otro paisnan y un di esakinan ta Aruba.
E biaha aki, Procolombia a organiza pa prome biaha e expo ‘Colombian Agribusiness Showroom Aruba’ pa asina por a haci un muestra di productonan alimenticio di Colombia.
Durante esaki, esnan interesa lo por a haya yen di informacion y tambe un ‘taste’ di e mihor productonan cu Colombia ta produci manera fruta, verdura, mangel, cuminda den bleki y tambe otro productonan di alto calidad.
Tambe por a haya oportunidad di combersa y intercambia cu e cunukeronan y productornan colombiano kendenan a amplia ariba nan oferta y tur locual nan tin pa ofrece den exterior.
E evento aki a tuma lugar diahuebs na Renaissance Convention Center y a conta cu un bon acogida di e publico na Aruba.
Enrique Stellabetti, Director d Procolombia pa e oficinanan den Caribe, a duna di conoce den entrevista cu DIARIO cu e evento aki a nace door di un iniciativa di nan como entidad di promocion.
Nan a wak e cercania cu Aruba y nan a constata cu na e isla no conoce tur e productonan colombiano. Ademas di esaki tin e interes di e exportadornan, pero nunca tabata tin un aproximacion na e mercado, a señala.
Asina a nace e idea di realiza un ‘showroom’ cuminzando cu e parti di alimentonan. E posibilidad cu Colombia tin di cultiva e 365 dianan di aña a permiti’e tin cierto experiencia den e sector di productonan fresco y procesa, Stellabatti a indica.
Esaki a trece cune cu Colombia por tin un potencial gigantesco den nan exportacionnan. A pensa cu mester probecha e bon oportunidad cu Aruba y cu e turismo entre e paisnan ta hopi bon. “Nos ta kere cu nos por complementa e necesidad aki”, a expresa.
E biaha aki, a conta cu presencia di 18 empresario presentando tur tipo di producto manera productonan organico, deshidrata, fresco, procesa, entre otro.
Tambe tin empresanan dedica na e panaderia, snacks, condimentonan y cuminda frozen. E portfolio di productonan tabata basta amplio ofreci door di empresanan diverso y cu un experiencia extenso, e ehecutivo a indica.
