Despues di un par di luna di a firma “Letter of Intent” cu Hulanda:
ORANJESTAD (AAN) – Den conferencia di prensa di Gobierno, Dialuna, Minister Andin Bikker a referi na un proyecto yama “Leerorkest”, di cual un etapa a wordo inaugura dialuna anochi mes. E proyecto aki ta consisti di varios faceta, segun e dignatario a indica, y el a splica di kico esaki ta consisti.
E mandatario a splica cu Leerorkest ta un orkesta unda personanan di menos recurso, por ehemplo un mayor cu tin entrada minimo y cu kizas ta soltero of divorcia, y no por paga les pa un of mas di su yiunan pa siña toca un instrument y e ta costa hopi recurso.
Los di esey si e mayor kier siña e yiu pa toca un instrument, hopi biaha e compra di esaki ta un obstaculo riba su mes.
E mandatario a menciona cu durante e bishita di su colega di Husticia di Hulanda na Aruba, gobierno a wordo mustra riba e concepto di Leer Orchestra, cu ta traha perfectamente bon na Hulanda y na Corsow.
Mesora e mandatario a prepara un letter of intent cual a wordo firma entre ambos minister y minister di Enseñanza sr. Lampe, y apenas un par di luna despues, a inaugura un di e facetanan di e Leerorkest, brindando asina e muchanan y adultonan e acceso pa por siña un instrument, gratuitamente.
E instrumentnan tambe ta wordo poni na disposicion di e alumnonan di manera gratuito. Esaki ta un logro concreto cu a firma e letter of intent aki.
