Home Gobierno Radisson Blue tin un acuerdo cu Colegio EPI y cu Universidad di...

Radisson Blue tin un acuerdo cu Colegio EPI y cu Universidad di Aruba pa nan graduadonan ta e prome pa haya un trabao den e proyecto

54
0
SHARE
- Advertisement -

Minister Dangui Oduber:

ORANJESTAD (AAN) – Minister di Turismo Dangui Oduber, den conferencia di prensa di gobierno, a duna di conoce cu siman pasa Gobierno di Aruba, Ministerio di Turismo y e grupo Radisson Blue, hunto cu e grupo inversionista di sr. Gonzalez, a firma un convenio despues di diez aña, cu e edificio Aqua Condominium a keda bashi.

Aqua Condominium ta situa banda di Palm Beach Mall, y por fin a haya un operador cu ta cumpli cu tur e rekisitonan cu gobierno ta stipula conforme su maneho.

E grupo Radisson Blue ta esun cu ta bay opera e ex-edificio Aqua Condominium cu ta bay bira un proyecto cu lo haya un inversion di 80 miyon dollar. E edificio aki tin 208 camber y segun e mandatario esaki ta crea un confianza grandi den Aruba su turismo, su economia y den e Gabinete Wever-Croes.

Minister Dangui Oduber a informa cu na momento cu tabata tin cambio di gobierno, e Gabinete a wordo acerca pa e grupo Radisson Blue. Gobierno a splica e grupo kico ta su vision y maneho y cu e ta busca turistanan afluente y cu ta gasta placa den nos economia, y pesey nan ta habri pa proyectonan cu ta cumpli cu esaki.

E mandatario a reitera cu acento, cu sin duda esaki ta e proyecto cu ta cumpli cu tur e rekisitonan y e ta den e famia di Radisson Blue, cu ta esun di mas halto mescos cu tin den e famia di Marriott, di cual Ritz Carlton cu ta e cadena di mas prestigioso den henter e famia aki.

El a remarca cu igualmente, Radisson Blue ta esun di mas halto y prestigioso den e famia Radisson, cu den pasado tabata tin un hotel na Aruba cual a wordo tuma over door di Hilton y cu a resulta hopi exitoso.

E dignatario a expresa cu si tur cos cana manera e planning di e grupo inversionista,  otro aña na luna di Maart of April, lo tin apertura oficial di e proyecto y esaki sigur ta nifica un empuhe grandi pa Aruba su turismo, su economia y pa e mercado laboral ya cu mas di 200 cupo di empleo lo wordo crea, pa nos mes hendenan.

Minister di Turismo a informa tambe cu ya caba Radisson Blue tin un acuerdo cu Colegio EPI y cu Universidad di Aruba, pa nan graduadonan yiu di tera ta e prome pa haya un trabao den e proyecto aki, mescos cu ta e caso na Hyatt Place, cu tambe lo habri su portanan dentro di poco, y cu ta un proyecto mas chikito pero unico den su estilo.

Hyatt Place ta un proyecto di acomodacion cu ta bay wordo ofreci na e guestnan cu kier keda dos of tres anochi. E mandatario a pone enfasis riba e importancia cu Hyatt Place tin un gerente Arubiano, y cu 43 cupo di trabao cu a ser crea ta pa hende local so, y cual inversion ta di 50 miyon dollar.

Minister Dangui Oduber a remarca cu gobierno kier bin cu proyectonan pa stimula Aruba su economia, creacion di empleo pa nos propio yiunan di tera, y e lo no ta diferente den e proyecto di Radisson Blue.

- Advertisement -

DUNA COMENTARIO

Please enter your comment!
Please enter your name here