Reino mester impone sistema nobo pa traspaso gobierno

    288
    0
    SHARE
    - Advertisement -

    Tur rapport oficial ta riba un linea riba origen desastre actual

    *Citgo y otro hazañanan politico tabata wega cruel cu trahado  

    *Sugar Tax ta prueba con intencionalmente ta crea tension peligroso

    ORANJESTAD (AAN) — “Ta un caos total a wordo crea te cu 2017. Gobierno anterior no a respeta leynan pero a viola tur ley cu tabata limita e poder cu el a duna su mes. E loke ta pasa na Aruba awe ta exigi pa Reino impone un sistema nobo cu ta exigi pa traha un rapport total di loke e gobierno cu ta baha ta laga atras.”

    Hopi preocupacion tin pa e problemanan cu Aruba ta confronta actualmente pero cu por a spera a base di e situacion cu a presenta su mes na 2017 ora ya e fantasma di proyecto Citgo a rementa.

    “Gobierno Mike Eman tabata sa cu Citgo lo no logra. Wega a wordo haci cu trahadonan cu hasta a wordo pidi pa bolbe Aruba. Un speransa tabata wordo hinca den pueblo cu un proyecto fantasma a base di un acuerdo di halto riesgo contra cual henter mundo responsabel a adverti.”

    Informantenan cu a papia cu DIARIO ta sumamente preocupa pa e problemanan serio cu segun nan opinion parcialmente tambe ta wordo provoca intencionalmente pa asina por crea caos y tension na momentonan cu Aruba mester di trankilidad.

    “E unico forma pa evita cu loke ta pasa awe por bolbe tuma luga den futuro, ta pa e Camara di Integridad wordo uza pa cada termino di Gobierno termina cu presentacion real di e estado di e pais na pueblo. Hulanda cu ta tene duro na e garantianan pa pueblo a base di Statuut mester impone cu ora un termino di gobernacion pasa, cifranan y rapport ta bini riba mesa pa asina pueblo sabi kico ta pasa,” a wordo splica na DIARIO.

    Atrobe informantenan ta indica cu lo pio cu por pasa Aruba na e  momentonan aki ta, pa e tension actual sigui.

    “Un rato mas y turismo tambe ta den problema a base di situacionnan cu ta wordo crea intencionalmente y di cual Sugar Tax ta e prueba di mas grandi. Gobierno anterior a hinca Sugar Tax den su promesanan di campaña. Awor problemanan serio ta wordo crea,” a wordo indica.

    Trahadonan ta birando e victima directo pasobra ora pone trabou na Aruba na peliger, ta pone pan di trahado na peliger.

    “No tin respet mas pa trahado cu den e caso Citgo y mas recientemente a wordo uza,” a wordo indica.

    Mester introduci un ley cu lunanan prome cu eleccion ta traha un resumen di tur loke e gobierno ta bay laga atras. E herencia aki ta wordo publica pa henter pueblo tuma nota di tur detaye. Esaki ta e principio, segun informantenan cu ta rechasa loke ta pasa actualmente na Aruba, cu ta biba cu un desastre cu el a hereda despues cu ocho aña larga a ciega pueblo pa e realidad destructivo den cual a hinca Aruba y cu awor ta rementa.

    “Si Reino kier interveni e mester presenta un ley pa caba cu e tipo di wega politico aki,” a wordo treci dilanti.

    Actualmente ta den relatonan separa ta mira con gobierno anterior a destrui Aruba. E rapport “Bo Aruba” concretamente a splica e drama di proyectonan den cual fondonan di pueblo a wordo uza contra tur ley na forma iresponsabel y pa cual Aruba awe mester paga.

    Un rapport similar pero incluyendo tur placa cu a wordo gasta y cu ta representa e berdad di Aruba, mester bira realidad prome cu tur eleccion, segun informantenan clave cu tin miedo pa e consecuencia di e tension actual pa bienestar di Aruba.

    “Pa ganashi politico intencionalmente ta crea desastre na e pais y no solamente ta afecta oponentenan politico den gobierno, pero henter e pais,” a wordo treci dilanti.

    Pa esaki tambe Reino mester tin bista ora otro siman e sinta na mesa cu Aruba, a wordo conclui. 

    - Advertisement -

    DUNA COMENTARIO

    Please enter your comment!
    Please enter your name here