Home General Respet mutuo Reino y Aruba mester crea futuro nobo pa Aruba 

Respet mutuo Reino y Aruba mester crea futuro nobo pa Aruba 

89
0
SHARE
- Advertisement -

Analisis

Alma di Statuut no ta poder pero bienestar di ciudadanonan 

  • Crisis regional ta uni na e crisis crea dor di debe nacional y Citgo
  • Autonomia y asistencia mutuo ta e base di relacion den Reino

For di momento cu oficialmente a bira conoci cu Aruba ta den e pio crisis di su historia como pais autonomo den Reino, DIARIO a base di estudio nobo y investigacionnan a duna guia na e pueblo di Aruba.

Nos a haci uza di informantenan ya cu varios factor a uni pa hinca Aruba den un situacion mucho mas dificil pa e pais riba su mes soluciona.

Pa por sirbi pueblo di Aruba cu ta e motibo di nos existencia, nos ta trata di informa pueblo na e haltura cu e Arubiano merece pa asina nos tur hunto por carga Aruba y hiba nos pais na un futuro nobo.

Durante ultimo dies aña, Aruba a wordo confronta cu problemanan cu nunca el a pensa di experencia.

Autonomia di Aruba a base di realisacion di Status Aparte a bira realidad a base di responsabilidad pa bienestar di e ciudadanonan di Aruba cu ta alma di nos pais.

Awe Aruba no ta baha cabes pa Reino. Awe Aruba ta para fuerte den su sapato y cu su cabes na halto ta duna na su gobernacion Arubano e autoridad pa bay atende cu Reino con ta duna contenido na Statuut.

Pa nos comprende kico ta bay pasa, nos mester mira e alma di Statuut cu ta e ciudadano. E relacionnan di paisnan den Reino cu e Statuut ta regla, ta basa riba e miho condicionnan di bida posibel pa tur ciudadano di Reino Hulandes pues no pa Aruba so.

Ora decisionnan wordo tuma den seno di Gobierno di Reino cu ta toca tur pais den Reino, e Minister Plenipotenciario di Aruba tambe ta participa. Pues si ta trata asuntonan di Hulanda, e tambe ta duna su opinion hunto cu Ministronan di Hulanda y Ministronan Plenipotenciario di Curaçao y St. Maarten.

E Statuut ta basa riba autonomia di paisnan den Reino. Pero tin un condicion pisa. E paisnan tin e deseo di asisti otro ora esaki ta necesario.

Pa Aruba por sobrevivi e situacion actual, e mester di yudansa di Reino. Laga nos no practica mentira.

Aruba mester bandona e crisis cu su gobierno anterior a crea den un situacion regional y mundial sumamente dificil. E situacion na Venezuela tin un impacto enorme riba Aruba cu mester atende cu refugiado pero tambe cu siguridad nacional.

E normalidad na Aruba a disparce loke ta bini dilanti den e barconan di fruta cu no ta bini mas y ta haci nos bida mas caro.

Arubianonan cu tabata haci negoshi cu Venezuela y asina tabata haya un entrada extra, awor ta bay otro destinacion.

Aruba ta den un situacion pa cual Statuut ta exigi un solucion. Respet entre gobiernonan di Reino y di Aruba mester guia Aruba pa recuperacion cu Aruba no por alcansa riba su mes.

Reino Hulandes lo mester yuda Aruba haya un prestamo mas facil pa paga e debe nacional y Reino Hulandes mester pone nos administracion nacional na nivel pa asina nos bienestar ta sigura awe y mañan.

Nos bista mester ta dirigi riba futuro generacionnan cu mester di comunidad den cual e hende ta central, loke ta exigencia di nos constitucion, Statuut pero tambe e programa di gobernacion cu Minister Presidente Evelyn Wever-Croes mester duna contenido.

Ban pa adelanto di Aruba, nos pais!

- Advertisement -

DUNA COMENTARIO

Please enter your comment!
Please enter your name here