Home Parlamento Richard Arends a aproba pago for di RdA ariba mesun dia cu...

Richard Arends a aproba pago for di RdA ariba mesun dia cu el a huramenta como minister

408
0
SHARE
- Advertisement -

Endy Croes cu prueba:

ORANJESTAD (AAN): Dialuna durante e conferencia di prensa semanal di fraccion di MEP, Endy Croes a papia riba e asunto rond di Parlamentario Richard Arends, relaciona cu su funcion como director financiero di RdA.

Croes a indica cu riba 20 di October 2016 Mike de Meza a firma un documento pa pone Richard Arends bira e director financiero di RdA.

“Riba prome di November 2016 De Meza y Arends a firma un documento, unda cu Arends su salario tabata mas di 22.000 florin pa luna”.

“Net den November Eman a hasi un apelacion na Arends pa e bira Minister, ora cu Otmar Oduber a tuma su retiro for di Gobierno di AVP”.

“De Meza despues a firma un documento riba 28 di November 2016, pa duna Arends un asina yama Bijzonder Verlof, pa e traha como minister”.

Esaki segun Croes, kende a sigui bisa cu den luna di October cu ta e luna den cual Arends a haya un contrato cu RdA, el a factura e refineria 13 recibo cu sumanan di 36 mil, 39 mil etc.

“Den October so el a strika 245 mil florin pa conseha RdA”.

“Cu e otro lunanan aden el a  cobra mas cu 400 mil florin, via su compania Horizon”.

“Ora cu dia 24 di November 2016 a yega tabata dia di pago di salario y Arends a cobra 31.200 florin”.

Esaki segun e parlamentario di MEP, kende a presenta documentonan cu e sumanan riba dje.

El a sigui bisa cu ora cu gobernacion a cambia, De Meza a firma un documento riba 17 di October 2017 pa bolbe duna Arends un verlof te ora cu e no ta den Parlamento mas.

“Arends a bisa cu esaki no ta berdad, mientras cu de Meza a bisa cu el a duna Arends verlof”.

“Richard a core traha un carta Augustus 2019 pa pidi su retiro for di RdA, mientras cu semper el a keda para ariba cu e no a traha como director financiero di e compania”.

“El a keda gaña y awe mi ta comproba cu Richard ta un mentiroso”.

Esaki segun Croes, kende a presenta documentonan di pagonan online cu RdA a hasi, cu autorizacion di Arends como director financiero di e compania.

E fecha riba e statement di online banking ta 16 di November 2016.

Riba e statement e ex director Koolman a verifica e pago, mientras cu Arends a autoriza e pago di 8.900 florin na un compania di construccion.

“Richard a bisa cu e no tabata traha, pues el a gaña tur hende y awe Richard mester tuma honor na su mes y retira”.

Esaki segun e parlamentario, kende a sigui bisa cu tin mas ehempel, incluyendo un pago di 58.000 florin.

E pago aki a wordo hasi riba 30 di November 2016, cu ta e mesun dia riba cual el a huramenta como minister dilanti di Gobernador.

E statement ta mustra cu e pago a wordo manda 9:07 di anochi, despues cu mainta el a huramenta como minister.

 

- Advertisement -

DUNA COMENTARIO

Please enter your comment!
Please enter your name here