Home Parlamento Robert Candelaria mustrando cu AVP ta preparando atrobe pa bay salba Aruba

Robert Candelaria mustrando cu AVP ta preparando atrobe pa bay salba Aruba

85
0
SHARE
- Advertisement -

ORANJESTAD (AAN): Parlamentario Robert Candelaria di partido AVP durante Encuentro cu Boluntarionan 2019, a laga sa cla y raspa cu Partido AVP un biaha mas den pleno preparacion pa bolbe salba Aruba.

El a puntra, cu ora pueblo pensa riba AVP, kico ta bin na bo mente? Bo ta pensa riba un organizacion, of un movemento of djis un otro partido politico?  Ora bo wak rond aki na Aruba, bo por mira frutanan tangibel cu ta demostra e existencia di Partido AVP?

Candelaria a pidi pueblo pa refleha hunto un rato riba ken nos ta, kico nos Partido a nifica pa Aruba y pakico nos ta existi.  Y el a bisa cu berdad Partido AVP, un biaha mas, ta den pleno preparacion pa bolbe salba Aruba.

Nunca esaki no tabata facil, pero sin reto, nunca tin victoria. Un elemento indispensabel den temporada di preparacion, manera nos ta den awor, ta cu bo mester tin un anker pa ancra bo na bo pincipionan, na ken bo ta.

Awor ken ta AVP? Kico nos ta para pe? Ora nos bisa cu nos base ta Cristian Democrata, kico esaki ta nifica y con nos por mira esaki back den nos mes y den nos Partido?

Nos pilarnan cu nos ta steun riba dje ora nos ta traha riba vision pa futuro ta: husticia social, solidaridad, responsabilidad comun y bon mayordomia.

Pero ami ta gusta haci algo dificil bira simpel pa tur compronde. Por resumi e 4 puntonan aki den amor pa prohimo y amor pa patria.

E miho ilustracion di “amor pa prohimo” ta worde haya den e storia di e “Bon Samaritano”, e storia ta conta di un persona cu a worde atraca y laga herida benta canto di caminda.

Algun hende cu bo a spera cu a dun’e un man, a pasa banda di dje y lag’e benta canto di caminda den e estado critico cu e tabata aden.

Pero, un Samaritano, a scohe pa sacrifica su mes siguridad, su mes tempo y su placa y duna e pober homber un man. El a limpia su herida, transport’e riba su burico y hib’e un posada y paga pa su estadia den e posada y pa su cuido. El a bay mas leu di bisa cu dia e regresa, lo e paga pa gastonan adicional si esey ta e caso.

E storia aki ta simbolisa cu ora bo ta stima bo prohimo, bo mester sirbi bo prohimo. No stime cu palabra bunita y promesa vano so, pero stim’e door di dun’e yudansa, guia y cuido, cu bo hechonan. “Actions speak louder than words”, of pa bis’e di un otro manera, ‘people may doubt what you say, but they will believe what you do.’

Ora hende priminti un cos y haci otro, “Bo lo sinti e cambio…”

Aruba awor mester di su bon samaritanonan un biaha mas. E mester di esunnan cu lo para keto, mira su necesidadnan y duna tur loke nan por pa salb’e y cuid’e.

E mester di hende cu amor real pa prohimo y amor real pa patria. Aruba un biaha mas mester traha pa ningun mucha mester drumi cu hamber, ningun mayor soltero no mester ta para su so den cuido y educacion di su yiunan, esunnan cu pa cualkier motibo ta den un dolor social, mester sa cu tin hende cla pa lanta nan di suela y yuda nan pa dilanti,” Parlamentario di AVP, sr  Robert Candelaria a declara durante di su discurso na e encuentro cu boluntarionan.

- Advertisement -

DUNA COMENTARIO

Please enter your comment!
Please enter your name here