Aruba Beach Tennis Open 2019 (ABTO 2019)
ORANJESTAD (AAN): “Tur cos ta canando tremendamento bon”, asina Sjoerd de Vries, director di Beach Tennis Aruba a relata durante un combersacion, pa asina aki por ricibi mas informacion riba e Aruba Beach Tennis Open 2019.
Desde siman pasa, por a tuma nota, con trabaonan a cuminsa na Bushiri, net dilanti AMC Unicon, pa asina segura cu e luga lo ta completamente cla y apto pa e evento mas grandi y number uno di mundo den e deporte di Beach Tennis. Cu e cambio di Eagle Beach pa Bushiri, no unicamente esaki a trece cune cambionan den localidad, pero sigur cu si, cambionan grandi den e logistica di e evento. Tur aspecto mester a wordo calcula di nobo, paso e ta un localidad nobo.
Pero nos tur sa, cu e organisadornan di e evento aki, ta hende nan specialisa den esaki. Beach Tennis Aruba, tin mas cu 10 aña organisando e evento aki, sin ningun problema, atrayendo mas cu 2500 persona pa dia, cu ta bin experiencia e weganan y e atmosfera di e evento completo. Combersando cu Sjoerd, a puntre kico ta e cambionan di mas grandi pa loke ta trata e logistica, awo cu e evento lo tuma lugar na Bushiri y no na Eagle Beach.
“Na prome lugar, nos a subi e cantidad di veld na 45, nos lo tin un stadion mas grandi ainda cu e añanan anterior. Di e 45 veldnan, 20 lo tin lus cu ta nifica cu e weganan lo bai sigur te cu 9or di anochi sin problema. Lo tin mas lugar pa sinta y tambe lo introduci 3 veld, caminda lo ta bai tin demostracion di e deporte aki na esnan cu ta interesa pa siña. Sigur no por laga afor tur e standnan, e bar bon surti manera sempero, cushina di Gianni’s tambe lo tei”. Sjoerd no kier divulga tur cos, lo tin mas sorpresa, pero lo informa esakinan despues.
