Home Editorial Siguridad Nacional ta exigi pa mantene frontera cu Venezuela cera

Siguridad Nacional ta exigi pa mantene frontera cu Venezuela cera

92
0
SHARE
- Advertisement -

Editorial

E prome tarea cu gobernacion di Aruba tin na e momentonan aki, ta e siguridad nacional di Aruba. Informacionnan cu DIARIO ta presenta awe ta confirma e preocupacion serio pa e peligernan cu ta rondona nos pais.

Actualmente nada por ta mas importante cu e garantia di bienestar di e pais y su poblacion cu ta bao menasa Venezolano directo y ta exigi tur medida di siguridad cu Gobierno di Aruba y Reino mester tuma.

Prome Ministro di Aruba, mr. Evelyn Wever-Croes a demostra su responsabilidad ora el a dicidi cu e frontera cu Venezuela ta keda cera y no ta wordo habri por lo pronto.

Manera DIARIO awe lo presenta na su lectornan, Aruba ta den un estado di alarma creciente pa motibo di e desaroyonan na Venezuela cu ta alcansa un nivel explosivo. Na e momentonan aki no por papia di habri frontera cu Venezuela, caminda regimen Nicolas Maduro abiertamente ta expresa su pensamento cu e mester libera Aruba di e lasonan cu Aruba tin cu Reino Hulandes.

No ta prome bes cu Chavistanan ta expresa nan deseo pa tuma mando di Aruba y e otro islanan Hulandes dilanti costa Venezolano. Na e momentonan aki, e menasa pa libertad di Aruba di parti di regimen Nicolas Maduro ta wordo lansa den un confrontacion entre mundo liber y podernan comunista cu kier expande nan mes den nos region.

E poder cu petroleo a duna Nicolas Maduro ta yega na su fin y Cuba tambe ta confronta problemanan serio despues cu gobierno Mericano a dicidi e siman aki cu no ta permiti mas pa manda placa for di Merca pa Cuba.

E situacion di Aruba ta sumamente serio debi na e lasonan cu Aruba a crea cu regimen Nicolas Maduro cu e proyecto Citgo. Awe e hecho cu regimen Maduro a perde Citgo, ta nifica final di sumanan enorme di Citgo cu tabata wordo uza pa e revolucion di Nicolas Maduro.

Aruba actualmente ta bou vigilancia y medida halto di siguridad y hamas Prome Ministro Wever-Croes por habri frontera cu Venezuela.

Aruba por ta sinti falta di fruta cu barconan tabata trece. Pero tin fruta disponibel for di otro pais. Come menos fruta hamas por wordo uza como motibo pa habri porta pa e peliger grandi cu regimen Nicolas Maduro ta representa pa e bienestar nacional di Aruba.

Awe Aruba mester di tur Arubiano den un situacion sumamente delicado. Hamas Arubianonan por tin diferencia di opinion riba e bienestar y e siguridad di nan pais. E amor pa patria di Arubianonan ta reconoci rond mundo y awe mester expresa su mes den nos sosten pa bienestar di nos pais.

E frontera di Venezuela mester keda cera y nos tur tin e deber pa demostra cu Aruba ta nos interes di mas grandi. Laga nos tur coopera den tur sentido cu nos siguridad y bienestar di nos pais y hunga confronta y deshaci di tur peliger cu por pone fin na nos felicidad como pueblo di Aruba!

- Advertisement -

DUNA COMENTARIO

Please enter your comment!
Please enter your name here