Home Gobierno Situacion di Venezuela ta pone cu Aruba mester tin un maneho stringente...

Situacion di Venezuela ta pone cu Aruba mester tin un maneho stringente pero humano

113
0
SHARE
- Advertisement -

Gobernador Boekhoudt:

ORANJESTAD(AAN): Paisnan chikito manera Aruba, cu un economia habri, ta mas vulnerabel pa circumstancianan externo. Por ehempel, globalizacion.

E factor aki ta rekeri un bon maneho di fluho di esnan di exterior cu ta bin establece nan mes na nos isla.

Pero tambe e situacion sin precedente di nos pais bisiña cu ta afectando nos den tur sentido y cada bes mas hopi.

Esaki Gobernador Alfonso Boekhoudt a trece dilanti den su discurso Diamars riba apertura di Aña Nobo Parlamentario.

“Nos ta sinti e presion cu esey ta trece riba e tereno di turismo, comercio, migracion, salubridad y seguridad”.

“Den e cuadro aki ta necesario sigui hiba un maneho stringente pero alaves humano, pa combati entrada y estadia no permiti na nos isla. Di e forma aki lo proteha orden publico y nos mercado laboral.

Ademas a introduci cambionan substancial den nos leynan di admision y expulsion, caminda a percura pa tin un procedura moderno pa atende cu e tematica di asilo”, segun su excelencia Boekhoudt, kende a indica tambe cu pa cu e prioridadnan di Gobierno, tambe ta tene cuenta cu e Metanan di Desaroyo Sostenibel di Nacionnan Uni.

E obhetivonan aki lo ta manera un liña cora den e politica general di Gobierno y lo sirbi como punto di salida pa e accionnan di Gobierno.

Algun di e Metanan di Desaroyo Sostenibel tin relacion cu iniciativa empresarial. Den e cuadro ey a firma na luna di Maart un acuerdo financiero cu Fondo di Desaroyo di Union Europeo.

Universidad di Aruba – den cooperacion cu Universidad di Leuven y UNDP – a inicia e facultad SISSTEM. E facultad aki lo brinda hobennan di Aruba y den region un estudio tecnico avansa na Aruba dirigi riba careranan den ramo di tecnologia y sostenibilidad.

Otro prioridad di Gobierno den cuadro di un desaroyo sostenibel ta innovacion. Gobierno di Aruba lo actua como catalisador pa esaki. Importante lo ta e preparacion y implementacion di e Plan di Transformacion Digital (e-Government) cu actualmente ta den desaroyo cu ayudo di partnernan internacional y demas expertonan.

“Nos tur ta convenci cu e capital di mas grandi cu Aruba tin ta su hendenan. Pa pone e ser humano central, ta nifica inverti den e conocemento di e hende, sin laga ningun hende atras. Pa realisa e meta aki, lo por spera programanan innovativo cu un enfoke riba desaroyo di habilidadnan pa tur edad y pa tur cu tin e necesidad of curiosidad pa sigui siña”.

“Esaki lo crea cuponan di empleo nobo a base di conocemento, y mas importante, sin pone mas presion innecesario riba nos recursonan natural, asina contribuyendo na un economia resistente y flexible”, segun e Gobernador.

 

- Advertisement -

DUNA COMENTARIO

Please enter your comment!
Please enter your name here