Psikiatra Van Gaalen:
ORANJESTAD (AAN): Tin malesanan of factornan cu por resulta of bira un ‘trigger’ pa loke ta e malesa di demencia, segun Dr. Hendrikus van Gaalen.
El a indica cu tin personanan cu por tin diabetes, presion halto, cu ta huma y esey na Aruba tin hopi. Hopi hende no ta come bon, no ta drumi bon y tur e factornan aki por crea demencia un tiki mas lihe cu otro.
Por sosode cu na Aruba tin te hasta mas casonan di demencia cu na Hulanda. Tin biaha ta tende cu tin personanan jong cu tin demencia y esey tambe por, a indica. Tur esaki e tin cu check a remarca.
Tin personanan cu a yega di pasa den un trama den trafico y por bira demente door di esey. E ta haya un shock na su cerebro y esaki por sosode na cualkier edad. Si esey no ta e caso, por ta droga, remedi, cu por crea demencia na un edad mas jong.
Geneticamente tambe tin un chens pa haya Alzheimer mas jong cu 65 aña. Pero esey ta un grupo chikito, e experto a duna di conoce.
E remedinan cu a purba te cu awo no tin su efectividad. Sinembargo, por evita di haya e malesa door di biba un bida saludabel. “Wak bo sucu, wak bo presion, keda move hopi, cosnan asina cu nos ta cu ta importante ora e remedi no ta yuda”, van Gaalen a enfatiza.
Lithium ta un remedi uza den pashentnan cu trastorno bipolar y por ta esey ta yuda. Na Dinamarca, laga sa, nan tin awa cu diferente nivel di lithium. Nan a constata cu si e lithium ta mas halto den awa, eynan tin menos Alzheimer. Asina nan a haya sa cu por ta lithium ta yuda un tiki y na Aruba ta bay purba esey tambe, hunto cu e internista, a bisa.
