Home Parlamento Tur 21 Parlamentario mester para hunto y defende Aruba su Constitucion

Tur 21 Parlamentario mester para hunto y defende Aruba su Constitucion

138
0
SHARE
- Advertisement -

Presidente di Staten mr.Ady Thijzen:

“No laga forzanan aheno kibra nos pais”

ORANJESTAD (AAN) – Presidente di Staten, mr, Ady Thijsen, den un entrevista basta extenso cu Matutino DIARIO, tocante e impasse cu a surgi entre Gobierno di Aruba y e Conseho di Supervision di Reino Hulandes, CAft, a splica tambe tocante loke nan conoce como “zachte lening”.

E zachte leining, ta e fianza cu nan por yuda Aruba haye riba e mercado di fianza internacional, pero pa motibo cu CAft mes no a supervisa manera mester ta, nan a crea cu e debe a bira mas grandi y claro, e interes tambe a bira mas halto.

Thijsen a reitera cu Gobierno di Reino mester duna di su parti y yuda Aruba, pasobra e placa no ta bin di dje, pero solamente yuda nos pais pa haya placa na un interes mas abao, pa por drecha Aruba su presupuesto y su problema financiero cual nan mes a ocasiona cu e situacion a bira asina malo.

“Nan no kier duna nos e cooperacion ey, y esey ta e parti unda nos ta pega. Gobierno di Reino ta bisa cu nos no a cumpli, pero esey no ta berdad”, Presidente di Parlamento a bolbe reitera.

Tristo ta cu apesar cu “union ta haci forza” y esaki  ta un berdad demostra, e fraccion di oposicion no ta cooperando tampoco, den e situacion aki.

“Pa ami, den un caso asina aki, no tin color politico. Aki ta pueblo di Aruba. Staten su 21 parlamentarionan mester para hunto, pasobra e situacion aki no por, e ta inhusto. Y nos tin cu para pa loke ta nos constitucion, pa loke nos ta kere den dje, y nos no por laga forzanan aheno kibra e pais aki”, mr. Thijsen a subraya.

El a comenta cu den Parlamento cada parlamentario di cada fraccion ta scoge kico nan kier haci.

“Si bo scoge pa no haci nada bo tin cu carga e consecuencia pasobra pueblo ta bay wak ta ken ta sali na su vanguardia. Anto, no bay hunga politica cu e situacion aki, cu ta hopi serio y cu Parlamento mester atende, pasobra e por tin consecuencia grandi pa nos pais”, mr. Thijsen a remarca.

Cu enfasis e ta agrega cu tur Parlamentario a huramenta pa defende e Constitucion di Aruba, salvaguardia e derechonan fundamental di e pueblo aki, y pesey e ta reitera cu acento cu no ta husto cu awor cu gobierno ta tratando di drecha henter e problemanan financiero cu a wordo crea y ademas un crisis economico y un crisis social pasobra tin problema social na Aruba, awor cu Aruba ta canando e caminda bon, loke Gobierno di Reino no kier a haci prome awor, si e kier kibra Aruba di cana un caminda corecto, pasobra nan no kier duna nos e sosten y esey no ta na su lugar, segun Presidente di Staten.

El a puntualiza cu no ta asina manera ta wordo bisa cu Aruuba kier elimina Conseho di Reino pasobra e ta kere cu e ta manda. “Pero no ta asina e cos ta bay. Akinan tin dos pais cu ta Estado di Derecho den Reino, nan tin cu respeta otro y Hulanda tin cu respeta nos como Estado di Derecho”.

“Nos no tin consensus Rijkswet cu nan paga nos debe pa nos, pa nan ta riba nos. No! Nos ta lucha y semper nos a lucha. Desde 1986 Aruba a lucha ora nos a haya Status Aparte y e refineria a cera. Nunca Hulanda a duna nos un debchi. Nos a bringa pa e lugar aki crece y lamentablemente, e situacion aki tin di haci di 2009 pa 2017”, segun mr. Thijsen.

E situacion a bira peor, ora cu Hulanda a entromete den dje, aunke e mester a hacie pasobra Aruba tabata bayendo hopi malo financieramente door di decisionnan robes, pero nan tambe mester a cumpli y pone ordo y bisa “esaki tin cu bay asina aki”, pero nan no a  hacie.

Aworaki Hulanda kier pa gobierno y parlamento di Aruba bay na su amen haci tur cos inhusto contra pueblo pa nan haya su gana y pueblo di Aruba paga pa tur e dañonan causa pa gobierno anterior y e falta di supervision di CAft.

“Den un Estado di Derecho Gobierno ta Gobierno y Parlamento ta Parlamento. Nos a bisa semper cu nos no kier ta un stample Parliament pero esey a pasa prome y ta un di e causanan cu e problema a bira asina grandi. Parlamento mester por actua. E por ta di mesun partido politico cu gobierno, pero esey no kiermen cu Parlamento mester a laga cos pasa y nan mester a mustra, podise su propio minister, cu e ta pasando ley, pero esey no a sosode”, Thijsen a expresa.

MEP den oposicion e tempo ey si a reacciona for di 2009 ora e cosnan a cuminza cana malo, y incluso na 2014-2015 a traha un rapport pa mustra gobierno cu “avion ta bahando y ta crash” loke a bira un berdad. Pero fraccion di MEP tabata minoria y no tabata wordo scucha.

- Advertisement -

DUNA COMENTARIO

Please enter your comment!
Please enter your name here