ORANJESTAD (AAN): Woman’s Club of Aruba recientemente a tene un evento cu nan a yama “Cheers to 85” unda a duna reconocimento special na prensa pa e sosten cu ta wordo brinda na e organizacion di servicio.
Milagros Posner, Presidente di WCA a expresa cu 85 aña pasa Woman’s Club of Aruba a wordo funda na Esso Club, e tempo ey Lago Club House, cu un participacion di 150 hende muher cu a wordo invita door di e casa di Lloyd G. Smith, kende tabata e presidente di Lago.
A indica cu su casa Lucy, a constata cu na Aruba tin hopi hende muher cu ta bin pa poco tempo cu nan casa y nan no conoce ningun hende.
Door di haci Woman’s Club ta yuda nan pa nan ta mas activo y alaves conoce otro hende y crea amistad pa nan sinti nan mes mas na cas, a agrega.
E club tabata hopi activo y tabata organiza yen di actividad na e clubhouse. Cu tempo, nan a invita e señoranan local pa join e club. Nan tabata reuni pa bebe coffie na Colony, na e casnan di e señoranan y tabata papia di cualkier topico.
Poco poco e funcion di e club a cuminza cambia y a bira un club mas di servicio pa comunidad cu ta loke conoce aworaki, Sra. Posner a duna di conoce.
Aworaki tin 36 miembro cu ta “life members”, pa mas di 40 aña.
Durante e evento special a honra miembronan di prensa cu semper ta coopera hopi bon cu WCA. “Nos ta gradici hopi na prensa pa tur e trabao cu nan ta haci di trece informacion na comunidad”, a expresa.
Aparte di esaki a celebra cu hendenan di afo cu a bin Aruba. A haci un bus tour, a organiza un ‘happy hour’ y un gala na Alhambra cual tabata un celebracion mas formal y unda a honra algun hende den comunidad cu a yuda WCA pa hopi aña, Milagros Posner a bisa.
