ORANJESTAD (AAN): E aña aki, Women’s Club of Aruba (WCA) ta celebrando e di 85 aniversario di existencia di NAN club den e siman di 17 pa 21 di september, 2019.
Presidente Milagros Posner hunto cu directiva, miembrecia y tur invitado special ta bin hunto pa e gran celebracion aki.
Nan ta ricibi un delegacion di General Federation of Women’s Club (GFWC) consistiendo di sra. Mary Ellen Brock, presidente internacional y sra. Mary Kaye Ernest, GFWC International Liaison.
Di hermana isla Corsou, lo tin representantenan di Steering Committee, Women’s Club Osculda sra. Glenda Maduro y varios otro miembro di directiva.
Riba e dia di nan aniversario, esta diamars 17 di september, tin un encuentro na MFA Santa Cruz den oranan di atardi cu prensa y invitadonan special, pa bisa nan danki pa nan cooperacion durante e ultimo añanan. Miembronan di prensa semper ta duna e oportunidad pa promove nan actividadnan y proyectonan pa recauda fondo pa asina por duna bek na comunidad.
Diabierna dia 20 di september tin un Bus Tour pa e miembronan y invitadonan di exterior, unda ta bay pasa den Colony unda WCA a cuminsa na aña 1934. Despues ta stop pa admira e arte den caya di San Nicolas.
Diasabra anochi dia 21 di september, tin nan celebracion cu Dinner & Baile pa nan clausura e celebracion di nan 85 aña di existencia.
“Nos ta sumamente orguyoso di por celebra nos di 85 aña di existencia, un aniversario hopi special, recordando tambe tur e damanan cu a sirbi of a asumi un posicion den directiva, loke no semper tabata facil, pasobra nos ta dedica hopi di nos ora pa haci trabou di boluntario”.
Ta conoci cu WCA ta e club di damanan hopi activo, cu varios comision trahando boluntariamente p’e comunidad di Aruba. Dia 17 di september 1934, e damanan di Lago den Colony a lanta WCA y esaki a crece den e añanan cu a sigui. Directiva y membrecia ta sumamente orguyoso di celebra nan aniversario y nan lema p’e aña aki ta … “Cheers to 85!”
E Comision organisador ta consisti di Adelaida Ponson (presidente di comision), Diana Uchtmann, Vivian Storm, Omaira Silva, Ursly Silberie, Minerva Geerman, Anna Lee y Milagros Posner, presidente di club.
Nan ta duna un danki grandisimo na tur nan sponsornan, cu a yuda nan den tur tempo y specialmente e aña aki, pa asina nan por celebra nan aniversario, ya cu WCA ta e club di servicio cu mas tanto aña aki na Aruba.
