Home Gobierno 2019 lo supera perspectiva positivo di turismo di 2018 y tin bon...

2019 lo supera perspectiva positivo di turismo di 2018 y tin bon pronostico pa 2020

36
0
SHARE
- Advertisement -

Minister Dangui Oduber satisfecho:

ORANJESTAD (AAN) – Den cuadro di turismo, Minister Dangui Oduber a duna di conoce, den conferencia di prensa, cu el a ricibi e resultado di performance di e hotelnan pa luna di September, cu ta sumamente positivo. 

Resumiendo 2018:

Aki e mandatario a haci un pausa pa bay bek riba e aña 2018. El a expresa cu 2018 por wordo considera como un di e añanan den historia di Aruba su turismo, y tur indicador ta mustra esaki, manera e bishitantenan di ripiticion, e turismo di crusero, e RevPar cu ta un indicador hopi importante pa midi e cantidad di turista, a aumenta cu doble digit den 2018.

Esaki ta un aña cu Aruba a perde e mercado Venezolano por completo. Esaki tabata e di dos mercado di turismo mas grandi pa Aruba; el a genera turistanan cu tabata gasta hopi placa den nos pais su economia, pero debi na e situacion economico na Venezuela pero apesar di esaki e mercado Mericano a demostra un crecemento di 10% durante 2018.

Mas importante, e dignatario a subraya, ta cu e placa cu e turistanan a laga atras aña pasa, a crece cu casi 9%.  Turistanan a laga atras casi 400 miyon extra nos economia. 

Indicadornan hopi positivo pa 2019:

Biniendo bek na 2019, Minister Dangui Oduber a señala cu e no ta bay ta diferente. Tur e indicadornan ta positivo, y pa September e grado di ocupacion tabata 78.3% cu ta nifica un aumento di 4.2% en comparacion cu September 2018.

E RevPar a mustra un aumento di 10%. El a yega na 165.73 dollar cu ta sumamente halto pa luna di September, cu ta mustra cu e turistanan ta keda bin Aruba y cu nan ta turistanan afluente, manera Aruba ta enfoca riba dje, y cu e ta e mercado cu gobierno ta desea pa bin akinan.

Tumando e prome nuebe lunanan di e aña, pues di Januari te fin di September 2019, e grado di ocupacion ta na un average di 85.7% cu ta un aumento en comparacion cu 2018, y tambe e RevPar a crece cu 8.4% cu na placa ta un incremento di casi 18 dollar cu nifica 238 dollar pa luna.

Minister Dangui Oduber a expresa cu tur e indicadornan ta keda positivo y turismo ta keda e “driver” principal di Aruba su economia. Pues, turismo ta bayendo sumamente bon y gobierno ta hopi contento y gradici na tur e stakeholders, partnernan, empleadonan cu ta lanta mainta diariamente, pa duna e mihor di nan mes y keda brinda e bon servicio.

Hopi bon proyeccion pa 2020:

E dignatario a agrega cu e proyeccionnan pa 2020 tambe ta positivo, y Aruba tin un economia hopi fuerte cu pronostico cu pa 2020 lo haya un crecemento di casi 3.5% na proyectonan cu ta relaciona cu turismo.

El a señala cu pa mantene un calidad halto di turismo na Aruba, mester inverti den e producto, upgrade e pais y den esaki gobierno a anuncia varios proyecto. Algun di nan ta canando caba y otronan tin cu cuminza ainda.

- Advertisement -

DUNA COMENTARIO

Please enter your comment!
Please enter your name here