Home Hudicial 5 aña di prison pa homber considera coordinador di organizacion criminal di...

5 aña di prison pa homber considera coordinador di organizacion criminal di droga

801
0
SHARE
- Advertisement -

E mayoria a haya castigo combina

ORANJESTAD (AAN): Di e cinco sospechosonan, solamente un a haya castigo di prison completo. E otronan a haya castigo combina y tur e otronan ta liber.

E grupo K.C.R., H.M.O., R.M.O., C.V. y A.V.A., a presenta dilanti Hues pa scucha nan sentencia. Ta asina cu durante tratamento di e caso algun siman pasa, Hues a laga den libertad e homber A.V.A., C.V. y e dama R.M.O. Ta asina cu A.V.A. a wordo saca for di isla.

CASTIGO COMBINA

Hues a bisa cu e ta haya A.V.A. culpable di forma parti di un organizacion criminal. Hues a bisa cu A.V.A. tabatin combersacion cu H.M.O. caminda Polis a scucha tocante transportacion di droga. A.V.A. mes a admiti den Corte di a papia cu H.M.O. tocante 10 kilo di cocaina pero esaki no a sigui. Hues a mustra cu A.V.A. tambe a viaha cu C.V. di Venezuela pa Aruba. Hues a condena A.V.A. na 398 dia di prison di cual 150 dia ta condicional cu un tempo di prueba di 2 aña.

Pa loke ta C.V., Hues ta haya C.V. culpable di a forma parti di un organizacion criminal y a transporta droga. El a transporta droga pa Hulanda. Na opinion di Hues, aunke cu tin hendenan pa un tempo cortico a participa esey no ta kita afor cu nan a forma parti di e organizacion criminal. El a mustra cu na September 2018, C.V. tabatin combersacion tocante cocaina caminda H.M.O. a duna instruccion con mester haci cu e cocaina. Tambe cu C.V. mester a paga H.M.O. y cu H.M.O, a paga pa su viahe. Hues a condena C.V. na 398 dia di prison di cual 150 dia ta condicional cu 2 aña di prueba.

E dama R.M.O., Hues tambe ta haya cu a forma parti di e organizacion criminal. Hues a mustra cu R.M.O. a paga 1500 dollar pa sigaria y whisky pa su casa H.M.O. Hues a bisa cu e no ta kere esey sino cu e pago ta pa cocaina. Hues a conclui esaki, a base di combersacionnan scucha di H.M.O. cu ta papia den code. Den e acusacionnan contra R.M.O., Hues ta haya cu esaki ta e unico cos cu a keda prueba y a condena R.M.O. na 248 dia di prison, kitando e tempo cu e tabata sera den KIA. Esey ta nifica cu R.M.O. ya a sinta e castigo caba y no mester bay sera atrobe.

Pa loke ta K.R., Hues a bisa cu ta acusa K.R. di transporte di droga pa Hulanda via amigo, posecion di marihuana y forma parti di organizacion criminal. Hues ta haya cu no por prueba cu K.R. ta complice di transporte di cocaina pa Hulanda. Hues a mustra cu K.R. a yuda paga un parti di e ticket di N. pa bay Hulanda y a papia cu N. Pero esaki no ta suficiente pa bisa cu ta complice. Hues a declara K.R. liber pa e acusacion aki. Tambe Hues a declara K.R. liber pa e acusacion di lo a forma parti di un organizacion criminal. Na opinion di Hues, K.R. tabatin un combersacion so cu H.M.O. y esey no ta suficiente pa hay’e culpable di ta forma parti di un organizacion criminal. Hues a condena K.R. pa e marihuana cu el a wordo haya cun’e. Hues a condena K.R. na 90 dia di prison y a ordena pa laga K.R. liber. En realidad, K.R. a sinta mas castigo.

CASTIGO PA COORDINADOR

Pa H.M.O., Hues a mustra cu ta acusa H.M.O. di traficacion di 12 Kilo di cocaina pa Londres y 1 Kilo di cocaina pa Hulanda, posecion di arma y forma parti di organizacion criminal. Hues a bisa cu e ta haya H.M.O. culpable di tur e acusacionnan.

Hues a mustra riba e dos personanan deteni na Londres cu 2 maleta cu cocaina. Nan tabata kedando na un cas na Modanza na Aruba y tin prueba cu e maletanan cu a wordo usa a wordo prepara na Aruba. A mira e auto di H.M.O. cu e yiu tabata core 3 biaha para eynan. Tambe tin papia den code riba cocaina. Hues a mustra cu den Corte, H.M.O. a admiti cu a papia cu muher M. tocante droga pero nada mas. Hues no ta kere esey sino cu H.M.O. a haci’e. Tambe e homber N. cu a hiba droga Hulanda den bleki di pasta di coco, Hues a mustra cu a haya mesun bleki na cas di H.M.O. Tambe a duna C.V. instruccion con mester haci cu cocaina cu ta hole. Tambe tin combersacionnan cu hende for di Venezuela tocante prepara blekinan. A haya na un cas cantidad di blekinan di pasta di coco cu lo a wordo usa. Hues ta haya proba e posecion arma di candela.    Pa cu e castigo, Hues a mustra cu entre 2017 y 2019, H.M.O. tabata forma parti di un organizacion criminal.

Hues a mustra cu H.M.O. a papia den code via cellular pero Polis a logra dicifra esaki. A usa formanan pa transporta e droga. Hues ta considera H.M.O. esun mas grandi den e organizacion criminal y tabata coordina e transportenan di droga. Hues a tene cuenta cu den pasado caa H.M.O. a wordo castigo pa caso grandi di droga. El a condena H.M.O. na 5 aña di prison, kitando e tempo cu e ta sera den KIA.

 

- Advertisement -

DUNA COMENTARIO

Please enter your comment!
Please enter your name here