Home Hudicial 6 aña di prison exigi pa homber cu a tira otro tres...

6 aña di prison exigi pa homber cu a tira otro tres tiro den lomba

191
0
SHARE
- Advertisement -

Fiscal ta haya cu aki e acusado a purba mata e otro

ORANJESTAD (AAN) – Ayera mainta un cantidad di familiar y amistad di e sospechoso R.R.H., tabata presente den sala di Corte pa scucha e caso penal cu Ministerio Publico a cuminsa contra R.R.H. Fiscal ta haya R.R.H. culpable di a tira e homber L.M. tres biaha den lomba. R.R.H. a bisa cu el a haci asina pasobra e tabatin miedo cu L.M. lo a bay busca un arma pa mat’e. Fiscal ta haya cu R.R.H. a purba mata L.M. y a exigi 6 aña di prison, teniendo na cuenta tur loke a sosode promer cu e tiramento a tuma lugar.

ACUSACIONNAN

E acusacionnan cu Fiscal a presenta ayera mainta den sala di Corte contra R.R.H. (25) ta riba 17 November 2018, el a purba mata y maltrato cu un arma di candela. Tambe e ta wordo acusa cu entre 1 October 2018 te cu 17 November 2018 e tabatin un arma di candela den su poder.

Fiscal a bisa cu R.R.H. a tira L.M. tres biaha den su lomba. Den sala di Corte tabata presente e victima L.M., acompaña pa abogado mr. Zara. E abogado di R.R.H. ta mr. Mohamed.

MENAZA PA DEBE DI PLACA

Hues a bisa cu 17 November 2018 tabatin un tiramento den Caya Juancho Kock. R.R.H. a admiti di a tira 3 biaha biaha riba L.M. Hues a puntra R.R.H. pakico el a tira. Segun R.R.H. tabatin un discusion cu L.M. tocante placa cu R.R.H. lo debe. Esaki ta un asunto di bendemento di un scooter caminda R.R.H. a bende esaki y no a paga L.M. tur e placa. Segun R.R.H., el a paga L.M. completo. El a bisa cu L.M. ta un persona hopi peligroso y ta busca problema tur caminda. El a bisa cu L.M. a menace diferente biaha y pesey el a busca un arma di candela pa defende su mes. Segun R.R.H., ora el a bay Hulanda L.M. a bay su cas y a bisa su swa cu e tin un bala cu nomber di R.R.H.

TIRA TRES BIAHA DEN LOMBA

Dia 6 November 2018, R.R.H. a bin bek Aruba tur spanta pa menaza di L.M. Envez di keda na cas di su mama na Dakota cu ta 4 cas banda di esun di unda L.M. ta biba serca su mama, el a bay keda na cas di su partner su ruman na Rooi Afo. Despues a bay keda na Playa Linda door di miedo. Na dado momento R.R.H. a bay cumpra un revolver Cal. 38 Dia 16 November 2018 el a sali for di Playa Linda y segun R.R.H., e mesun dia L.M. a bay menace na cas di su mama den Caya Juancho Kock. R.R.H. a bisa Hues cu el a bisa L.M. e no tin mas placa pa L.M. pasobra e palabracion tabata 5500 y R.R.H. a pag’e 3500 dollars cu ta mas cu e suma ey.

Dia 17 November 2018, L.M. a bay na e cas di R.R.H. y den cura a cuminsa discuti cu e no ta bay si e no haya su placa. R.R.H. tabata hunto cu B.O. den cura y a bisa L.M. pa bay su cas pasobra e no tin mas placa p’e. E momento ey L.M. a kita su caminsa pa bringa. E amigo di R.R.H., B.O., a kita L.M. pa bay pafor. R.R.H. a bay den apartamento y den cushina abao den un cashi a coy e arma y hink’e den su saco di carson. El a bay pafor di cura bay para banda di auto. Segun R.R.H., L.M. a saca un sker p’e. E ora ey R.R.H. a cuminsa papia cu L.M. pakico e no ta wak pa su yiu muher y stop di busca problema. L.M. a bis’e cu e ta bay bin mat’e. Segun R.R.H. ora L.M. a bisa cu e ta bay bin mat’e, el a saca e arma y a tira L.M. cu tabata di lomba p’e canando bay.

Hues a puntr’e pakico el a tira. R.R.H. a bisa cu door di spanto el a tira pasobra L.M. a yega di tira mata caba. El a los 3 tiro. R.R.H. a entrega su mes y a mustra unda e tabatin e revolver scondi. Polis a haya e revolver cu 2 bala ainda aden. Psychiater a bisa cu R.R.H. tabata hopi emocional door di situacion y e dia lo a perde cabez y tabata menos responsabel pa tira.

VICTIMA A KEDA MANCARON

Abogado mr. Zara a presenta raport di dokter cu ta mustra cu entre 17 November 2018 y 17 December 2018, L.M. a keda interna den hospital pa e tres tironan cu el a sufri den lomba. E balanan a bora pulmon, dos buraco den stoma y tambe schouder y man drechi. Mester a haci tres operacion hopi grandi riba L.M. Dokter a bisa cu e recuperacion di L.M. lo bay dura hopi largo. Hues a lesa e raport y ta conclui cu ta herida severo L.M. a sufri.

Abogado mr. Zara a demanda 20 mil florin y inmaterial 30 mil florin. Mustra cu door di tiro, L.M. no a traha mas y mester cria su yiu. Ainda e ta bou tratamento. Door cu el a sufri herida severo e no por traha. Actualmente el a haya subsidio di gobierno pa mancaron. E lo keda mancaron pa resto di su bida door di tiro. Tur anja e lo mester evalua si e por traha y si e ta keda haya subsidio. L.M. a bisa cu e no por haci trabou pisa.

Hues a lesa e declaracion di L.M. cu a haci denuncia. Segun L.M. el a laga R.R.H. bende un scooter pasobra el a bay Hulanda cu intension biba aya. R.R.H. a manda 2500 florin p’e y bis’e cu e lo paga despues 3500 florin. El a bay diferente biaha pa e haya su 3500 florin y R.R.H. tabata tum’e haci. Segun L.M., dia 17 di November 2018, e amigo di R.R.H., B.O., a bis’e pa baha su voz y R.R.H. a bis’e pa bay. L.M. a sali pafor y bisa R.R.H. cu si e kier bringa. El a kita su camisa y para pafor. El a mira B.O. hari y el a bisa cu e ta bay su cas bin. El a cana bay y mira B.O. pasa R.R.H. algo. El a mira su camisa na sanger y despues a tende tiro. L.M. a bisa cu nunca el a menaza R.R.H. cu morto. El a bisa cu el a bisa R.R.H. cu e lo dal’e un biga. El a desmenti di a saca sker pa R.R.H.

Hues a lesa declaracion di algun testigo cu ta bisa cu L.M. lo a menaza R.R.H. Segun R.R.H., dia 6 September 2019 tabatin un caso penal contra L.M. caminda L.M. riba 4 Mei 2019 a menaza B.O. na un Chines. El a bisa cu L.M. a gaña den Corte cu el a cambia su bida pero no ta asina. El a bisa Hues cu B.O. ta mescos cu un famia p’e.

EXIGENCIA DI FISCAL

Fiscal a bisa R.R.H. a admiti di a tira 3 biaha riba L.M. Fiscal a remarca cu L.M. no a coopera cu Polis pa cu su situacion. Fiscal a sigui bisa cu danki Dios cu L.M. no a muri. E ta haya cu aki por papia di intento di mata. Psychiater ta papia di no completo responsabel. Na opinion di Fiscal, si mira ki castigo Corte Superior ta duna pa tiramento, Hof ta duna 8 aña pa intento di mata cu arma di candela. Fiscal ta haya cu tin un diferencia cu e caso aki mirando cu L.M. tabata menaza R.R.H. Tin diferente testigo ta bisa cu L.M. a menaza. E ta haya cu R.R.H. a bay di mas pa cumpra un arma pa defende su mes. Pa cu e castigo, Fiscal a bisa cu e ta tene cuenta cu esaki y L.M. su carchi di castigo cu ta mustra cu e ta peligroso.

Pa cu e demanda di daño, Fiscal a bisa cu tin e chens pa den casonan penal haci demanda. Den e caso aki e no ta facil pa determina e daño door cu L.M. no por a traha y ta haya cu mester haci un caso civil. Fiscal ta haya cu L.M. tambe a busca y mester determina e comportacion di L.M. den e caso aki pa calcula un daño inmaterial. Pesey e ta haya cu mester declara L.M. no admisibel y pa haci un caso civil. Fiscal a exigi 6 aña di prison pa R.R.H.

DEFENSA DI ABOGADO

Mr. Mohamed a bisa Hues cu R.R.H. a admiti di a tira L.M. E abogado ta haya cu mester tene mas cuenta cu e circumstancia. El a mustra cu R.R.H. ta un persona hopi pasivo y dedica na famia. El a mustra cu L.M. tabata menaza R.R.H. y su famia pa e haya e placa. E abogado ta haya cu L.M. por a busca un abogado pa e haya su placa pero a scoge pa menaza R.R.H. constantemente. E miedo di R.R.H. a bira mas y mas grandi pa proteha su famia y pesey el a dicidi di busca un arma. E ta haya, manera Fiscal a mustra, e comportacion di L.M. a conduci na esaki. Pesey el a pidi psychiater pa evalua y psychiater a bisa cu R.R.H. ta menos responsabel. Mr. Mohamed ta haya cu 4 aña di prison lo ta na su lugar y cu un periodo condicional. E ta comparti punto di bista di Fiscal cu mester rechaza e daño material y laga haci un caso civil.

Hues a sera tratamento di e caso y a bisa cu lo bay studia e caso y 25 October pa 8.15 di mainta lo tin sentencia.

- Advertisement -

DUNA COMENTARIO

Please enter your comment!
Please enter your name here