Home Hudicial 6 aña di prison exigi pa homber envolvi den arma, preparacion di...

6 aña di prison exigi pa homber envolvi den arma, preparacion di atraco arma y droga

76
0
SHARE
- Advertisement -

ORANJESTAD (AAN) – E homber Dominicano biba na Aruba, R.D.P.(23), a scucha Fiscal exigi 5 aña di prison mas e 1 aña condicional pasobra R.D.P. a haci delitonan den su tempo di prueba. En total ta 6 aña Fiscal a exigi pa R.D.P., kende Fiscal ta haya culpable di ta meti den droga, armanan di candela, planea atraco arma. Hues a bay studia e caso y dentro di algun siman por spera sentencia.

PLAN PA ATRACO ARMA

Durante tratamento di e caso a sali na cla cu tur e caso aki a cuminsa ora cu un persona a bay haci denuncia di ladronicia di su brommer. E persona tabata cu vacacion y ora el a bolbe el a ripara cu nan a horta su brommer. Pa casualidad algun luna promer, Polis coriendo den Colony a para un pick up sospechoso. Den e baki tabatin un brommer tapa. Polis a saca potret di e number di serie y awor ta resulta cu ta e mesun brommer. A bay haci razia na e cas cunda R.D.P. ta keda y a bin haya un cantidad di cos na e cas entre otro droga y tambe den cellular di R.D.P. cu ta mustra cu R.D.P. ta forma parti di un grupo cu tabata haci cantidad di delitonan. Den su cellular a haya varios mensahe entre otro 5 Maart 2019 di un plan pa haci un atraco arma riba un joyeria.

Ora Hues a puntra R.D.P. riba esaki, el a bisa cu e no kier bisa nada riba esey. Fiscal a mustra cu 4 Februari 2019 a horta un Jeep y un cellular. A haya e yabi di e Jeep na cas di R.D.P.  E sospechoso a bisa Hues cu e ta traha riba auto y di tur e yabinan cu e tin, net esey ta di e Jeep? Fiscal a bisa cu tin un raport apart cu ta mustra cu e doño a reconoce e yabi di e Jeep y su cellular. R.D.P. ta para riba cu e cellular ta di dje.

ARMANAN DI CANDELA

Hues a mustra cu den e cellular a haya diferente potret di R.D.P. cu arma den man. Hasta potret di un mucha riba cama. Hues a reclama ta kico esaki ta! Segun R.D.P., ta arma di brothernan di bario. Hues a remarca cu for di e mensahenan R.D.P. ta papia di un arma cu no ta saca bala. Tin papiamento con mester traha cu e arma. Segun R.D.P. ta su brothernan. Tambe tin mensahe caminda ta papia di otro arma. Segun R.D.P., ta pronk e ta pronk cu arma. Hasta tin un grabacion riba e cellular caminda cu R.D.P. ta canta cu e lo tira. Tambe a haya potret caminda e ta mustra balanan y otro potretnan cu e ta manera tira. Hues a mustra cu tin whatsapp caminda ta papia di mester busca arma. Tambe cu e ta papia cu su mama cu e ta bin laat pasobra tin Polis ta controla. E mama ta bis’e pa bay poco poco cu e arma cu e tin cun’e.

CASTIGO PENDIENTE

Hues a bisa cu na 2017, R.D.P. a haya condena pa ladronicia y 21 Augustus 2018 el a sali liber, cu tempo di prueba di 2 aña. Fiscal pidi pa e 1 aña condicional bin aserca di e castigo cu lo bay pidi awor. Segun R.D.P. door di problema cu mayornan y su tata a dal’e te mand’e hospital tempo e tabatin 14 aña, e no ta biba serca su mayornan. E ta haya cu su mayornan no ta dun’e nada y pesey tempo e tabatin 17-18 aña el a bay for di cas y ta biba cu amigonan.

EXIGENCIA DI FISCAL

Fiscal a bisa Hues cu a base di e ladronicia di brommer a bay haci investigacion na cas di e sospechoso y esey a trece tur e casonan aki. Tin un tap caminda a scucha di plannan di atraco y durante e investigacion na e cas a haya e brommer cu a wordo horta. Fiscal a remarca cu R.D.P. a duna Polis nomber falso. Dia 5 Maart 2019 a haci investigacion na e cas caminda for di cellular a haya cantidad di potretnan di cosnan malo cu R.D.P. tabata haci. Fiscal a bisa cu e no ta haya declaracion di R.D.P. confiabel.

Fiscal ta haya cu R.D.P. ta culpable di ladronicia di e brommer BMW y ta haya e danjo di H. aceptabel. Fiscal ta haya R.D.P. responsabel pa e lote di marihuana. Fiscal ta haya proba e plannan pa un asalto arma riba un joyeria. A haya yabi di un Jeep cu a wordo horta na Februari 2019 dilanti un club nocturno y tambe a haya e cellular di e dama doño di e Jeep. Haya R.D.P. culpable di posecion di armanan di candela y balanan. Tin combersacion di R.D.P. cu un homber E. cu actualmente ta sera na KIA pa matamento.

Fiscal a remarca cu R.D.P. ta blo bisa cu e tabata pronk, pero Fiscal ta haya cu R.D.P. ta culpable. Fiscal a bisa cu a logra para R.D.P. di haci un asalto arma. El a mustra cu recien a condena R.D.P. pa un serie di ladronicianan, pero toch el a sigui. Fiscal a pidi Hues pa ehecuta e 1 aña condicional pasobra R.D.P. a haci delitonan den tempo di prueba.

Fiscal ta haya cu Aruba ta mas sigur cu R.D.P. ta sera den KIA, pasobra R.D.P. kier pronk cu maldadnan. El a exigi 5 aña di prison y e 1 aña condicional. En total ta 6 aña di prison cu Fiscal a exigi.

ABOGADO

Abogado mr. de Sousa a pidi Hues pa tene cuenta cu e circumstancia cu R.D.P. a pasa tempo cu e tabata mucha. E abogado a mustra con e mucha a wordo seriamente maltrata pa su tata. El a pidi Hues pa no duna e castigo condicional adicional. El a pidi pa laga psychiater y Reclasering atende cu R.D.P.

Hues a sera tratamento di e caso y a bisa cu e ta bay studia e caso y 25 October 2019 lo tin sentencia.

 

- Advertisement -

DUNA COMENTARIO

Please enter your comment!
Please enter your name here